కామారెడ్డి (విజయక్రాంతి): విధి నిర్వహణలో నిర్లక్యం వహించిన తాడ్వాయి ఎస్సై వెంకటేశ్వర్లుపై (Tadvai SI Venkateshwarlu) సస్పెన్షన్ వేటుపడింది. ఈ నెల 12న ఎల్లారెడ్డి, తాడ్వాయి పోలీస్ స్టేషన్లను జిల్లా ఎస్పీ రాజేష్​ చంద్ర (SP Rajesh Chandra) ఆకస్మికంగా తనిఖీ చేపట్టారు. ఆయన వచ్చిన సమయంలో తాడ్వాయి ఎస్సై అందుబాటులో లేరు. ఉన్నతాధికారులకు సమాచారం ఇవ్వకుండా హెడ్ క్వార్టర్స్​ వదిలి వెళ్లవద్దనే నిబంధన ఉన్నప్పటికీ ఎస్సై తన సొంత ఊరికి వెళ్లారు. ఈ విషయమై స్థానిక సర్కిల్ ఇన్స్పెక్టర్, డీఎస్పీకి చెప్పకుండానే స్వగ్రామానికి వెళ్లినట్లు సమాచారం. దీంతో ఎస్సై వెంకటేశ్వర్లును ఎస్పీ రాజేష్ చంద్ర సస్పెండ్ చేశారు. తాడ్వాయి ఎస్సైగా వీఆర్​లో ఉన్న రాజయ్యకు తాత్కాలికంగా బాధ్యతలు అప్పగించారు.