మధ్యాహ్నం 12 గంటల ప్రాంతంలో శ్రీరామనవమి వేడుకలకు ఏర్పాట్లు సిద్ధం

లక్నో: శ్రీరామ నవమి పర్వదినాన ఉత్తర్‌ప్రదేశ్‌లోని అయోధ్య రామ మందిరాన్ని ఆలయ అధికారులు సర్వాంగ సుందరంగా అలంకరించారు. రేపు రామ నవమి సందర్భంగా ఆలయంలో బాల రాముడికి ప్రత్యేక అభిషేకాలు, పూజలు నిర్వహించనున్నారు. మధ్యాహ్నం 12 గంటల ప్రాంతంలో సూర్యతిలకం దిద్దనున్నారు. సూర్య కిరణాలు దాదాపు నాలుగు నిమిషాల పాటు బాల రాముడి నుదుటిపై పడనున్నాయి. ఈ వేడుకను తిలకించేందుకు ట్రస్ట్ ప్రత్యేక ఏర్పాట్లు చేసింది. ప్రతిఏటా శ్రీరామ నవమి రోజున రాముడి విగ్రహం నుదుటన సూర్య కిరణాలు ప్రసరించేలా అధికారులు ఆలయ నిర్మాణంలో ప్రత్యేక వ్యవస్థను రూపొందించారు.

ఆలయం మూడో అంతస్థు నుంచి గర్భగుడిలోని బాలరాముడి విగ్రహం నుదుటిపై సూర్య కిరణాలు పడేలా ఏర్పాట్లు చేశారు. ఇందుకోసం పరిమిత సంఖ్యలో పైపులు, కుంభాకార, పుటాకార కటకాలతో వ్యవస్థను రూపొందించారు. ఆలయ శిఖర భాగంలో సూర్యకాంతి గ్రహించేందుకు ఒక పరికరాన్ని ఏర్పాటు చేశారు. అక్కడి నుంచి  పైపులోపలికి కాంతి ప్రసరించి తిలకంగా కనిపిస్తుంది. మూడున్నర నిమిషాల పాటు కనిపించే ఈ సూర్యకిరణాల తిలకం 58 మిల్లీమీటర్ల పరిమాణంతో ఉంటుంది. రెండు నిమిషాల పాటు పూర్తి స్థాయిలో తిలకంగా కనిపించనుంది. శ్రీరామ నవమి రోజున ఉదయం 9.30 గంటల నుంచి 10.30 గంటల వరకు అభిషేకం, ఉదయం 10.40 గంటల నుంచి 11.45 గంటల మధ్య ఆరాధన కార్యక్రమాలు జరగనున్నట్టు ఆలయ ట్రస్ట్ ఇప్పటికే ప్రకటించిన సంగతి తెలిసిందే.