తెలుగమ్మాయి సుమయరెడ్డి హీరోయిన్‌గా నటిస్తూ నిర్మాతగా, రచయితగా వ్యవహరించిన చిత్రం ‘డియర్ ఉమ’. సాయిరాజేశ్ మహాదేవ్ స్క్రీన్ ప్లే, మాటలు, దర్శకత్వ బాధ్యతలు నిర్వర్తించిన ఈ సినిమాలో పృథ్వీ అంబర్ హీరోగా నటించాడు. ఈ చిత్రం ఏప్రిల్ 18న విడుదల కానున్న నేపథ్యంలో సుమయరెడ్డి మీడియాతో సమావేశమయ్యారు. ఈ సందర్భంగా చిత్ర విశేషాలతోపాటు తన గురించి ఆసక్తికర విషయాలను పంచుకున్నారు. 

సుమయరెడ్డి మీ నేపథ్యం ఏంటి?

మాది అనంతపూర్. మోడలింగ్ రంగం నుంచి ఇటు వైపు వచ్చా. నాకు చిన్నప్పట్నుంచీ సినిమాలంటే ఇష్టం. మొదట్లో సినిమాలు చేయడం అంటే చాలా ఈజీ అనుకున్నా. కానీ అది అంత సులభం కాదని ఇప్పుడు అర్థమైంది. 

ఈ కథ రాయడానికి, సినిమా చేయడానికి స్ఫూర్తి ఏంటి?

కరోనా టైమ్‌లో నాకు ప్రతిరోజూ ఓ కల వస్తూనే ఉండేది. అది నన్ను వెంటాడుతూ ఉన్నట్టు అనిపించింది. అలా ఆ కలలో వచ్చిన పాయింట్ మీదే కథ రాసుకున్నా. అందరికీ కనెక్ట్ అయ్యేలా మా చిత్రం ఉంటుంది.

ఈ సినిమాలోకి పృథ్వీ అంబర్ ఎలా వచ్చారు?

తెలుగు హీరోను తీసుకోవాలని ప్రయత్నించాం. కానీ చాలా కారణాల వల్ల మిస్ అవుతూ వచ్చాం. అయితే, పృథ్వీ అంబర్‌కు కథ చెప్పాం. కొత్త ప్రొడక్షన్ అని కూడా చూడకుండా కథ నచ్చిన వెంటనే ఆయన ఓకే చెప్పారు. 

ఈ సినిమా ద్వారా వైద్యరంగాన్ని విమర్శిస్తున్నట్టున్నారూ?! 

కార్పొరేట్ హాస్పిటళ్లలో జరిగే వాటిని చూపించబోతున్నాం. డాక్టర్లు, పేషెంట్స్‌కి మధ్య వారధిగా ఉండే వ్యక్తుల స్వార్థబుద్ధి కారణంగా ఏం జరుగుతుందో చూపిస్తాం. 

సినిమా ఎలా ఉండబోతోంది..?

ఈ సినిమా కాస్త ఫిక్షనల్. కాస్త రియల్. సోషల్ మెస్సేజ్ అని కాకుండా ఓ సొల్యూషన్‌ను కూడా చెబుతాం. అందరికీ అవగాహన కల్పించేలా ఉంటుందీ చిత్రం. హీరోయిన్‌గా ఉండి నిర్మాతగానూ సినిమా చేయాలని అనుకోలేదు. కానీ అలా చేయాల్సి వచ్చింది. 

ముందు అనుకున్న బడ్జెట్ కన్నా ఏమైనా పెరిగిందా?

ఈ సినిమాకు ముందు అనుకున్న దానికంటే ఎక్కువే పెరిగింది. కెమెరామెన్, మ్యూజిక్ డైరెక్టర్ ఇలా అందరినీ గుర్తింపు ఉన్నవాళ్లను తీసుకున్నాం. ఆర్టిస్టుల్ని కూడా చాలా సీనియర్లను తీసుకున్నాం. అలా ముందుకు వెళ్తూ ఉన్నకొద్దీ బడ్జెట్ పెరుగుతూనే వచ్చింది. 

నటించడం కష్టమా..? సినిమాలు నిర్మించడం కష్టమా..?

నటించడం చాలా సులభం. నిర్మాతగా ఉండటం చాలా కష్టం. అసలు ఒక్కోసారి ఎందుకు డబ్బులు ఖర్చు పెడుతున్నామో కూడా తెలీదు. కష్టపడి సంపాదించిన డబ్బు అంతా అలా వెళ్తుంటే బాధగానే ఉంటుంది. ఈ చిత్రం కోసం మేం అనుకున్న బడ్జెట్ కంటే చాలా ఎక్కువగా పెట్టేశాను.

మూవీ విశేషాలు, టీమ్ గురించి చెప్తారా? 

సాయి రాజేశ్ నాకు ఎప్పట్నుంచో పరిచయం. నా దగ్గరున్న ‘డియర్ ఉమ’ కథను ఆయనకు చెబితే చాలా నచ్చింది. అలా ఈ ప్రాజెక్ట్ ముందుకు సాగింది. ఈ సినిమాకు రధన్ మ్యూజిక్ ప్రాణం. కెమెరామెన్ రాజ్ తోట విజువల్స్ అందరినీ ఆకట్టుకుంటాయి.