1. ప్రత్యేక తరగతుల పేరిట ‘శిక్ష’ణ
2. అల్పాహారం లేక అవస్థలు
3. దాతల కోసం ఎదురుచూపులు

సిరిసిల్ల, నవంబర్ 29(విజయక్రాంతి): పదో తరగతి విద్యార్థులు పస్తులతో వార్షిక పరీక్షలకు సన్నద్ధమవుతున్నారు. ‘పది’లో ఉత్తమ ఫలితాల కోసం విద్యాశాఖ ప్రత్యేక ఈ నెల 1 నుంచి జిల్లా వ్యాప్తంగా ప్రత్యేక తరగతులను ఏర్పాటు చేసింది. ఉదయాన్నే పాఠశాలకు వస్తున్న విద్యార్థులు మధ్యాహ్న భోజన సమయం వరకు ఖాళీ కడుపుతోనే చదవాల్సిన పరిస్థితి నెలకొన్నది.

అల్పాహారానికి ప్రభుత్వం నుంచి ఉత్తర్వులు రాకపో వడంతో అధికారులు ఏర్పాట్లు చేయడం లేదు. బీఆర్‌ఎస్ హయాంలో కేసీఆర్ అల్పాహారం పథకం పేరిట ప్రారంభించి ఆదిలోనే  వదిలేశారు. కొత్తగా ఏర్పడిన ప్ర భుత్వం అల్పాహారం ఏర్పాటు చేస్తుందని ఎదురుచూసిన విద్యార్థులకు నిరాశే మిగిలింది. 

ఆరువేలకు పైగా విద్యార్థులు

జిల్లా వ్యాప్తంగా ఆరువేలకు పైగా విద్యార్థులు ‘పది’ వార్షిక పరీక్షలకు సిద్ధమవుతున్నారు. నవంబర్ 1 నుంచి పాఠశాలల్లో ఉదయం 8 నుంచి 9 గంటల వరకు ప్రత్యేక తరగతులు నిర్వహిస్తున్నారు. ఇంటి నుంచి 7.30 గంటలకు వెళ్లిన విద్యార్థులు ప్రత్యేక తరగతులు విని మధ్యాహ్నం భోజనం చేస్తారు. 4.15 గంటలకు పాఠశాల  పూర్తయ్యాక 5.15 గంటల వరకు మళ్లీ ప్రత్యేక క్లాసులు వినాల్సి ఉంటుంది.

ఇలా ప్రతి రోజూ అర్ధాకలితో విద్యను అభ్యస్తున్న తమకు చదువు ఎక్కడం లేదని పలువురు విద్యార్థులు వాపోతున్నారు. జిల్లా వ్యాప్తంగా 109 జెడ్పీ హైస్కూల్స్, 13 కేజీబీవీలు, టీఎస్‌ఎంసీ 7, ఒక కేంద్రీయ విద్యాలయం ఉన్నాయి. ఇందులో  6,918  మంది పదో తరగతి విద్యార్థులు.. బాలురు 3,186, బాలికలు 3,732 మంది ఉన్నారు.