కుమ్రం భీం ఆసిఫాబాద్ (విజయక్రాంతి): గ్రూప్-3 పరీక్షలకు కట్టుదిట్టమైన భద్రత ఏర్పాటు చేసినట్లు ఎస్పీడివి శ్రీనివాసరావు తెలిపారు. ఈనెల 16, 17న పరీక్షలు జరగనున్న నేపథ్యంలో శనివారం జిల్లా పోలీస్ కార్యాలయంలో పోలీస్ అధికారులకు, సిబ్బందికి పలు సూచనలు చేశారు. అనంతరం జిల్లా కేంద్రంలోని పలు పరీక్ష కేంద్రాలను సందర్శించారు. ఈ సందర్భంగా ఆయన మాట్లాడుతూ.. పరీక్ష కేంద్రాల వద్ద ఎలాంటి అవాంఛనీయ సంఘటనలు జరగకుండా చర్యలు తీసుకోవడం జరిగిందన్నారు. ప్రశాంత వాతావరణంలో పరీక్షలు జరిగే విధంగా కట్టుదిట్టమైన భద్రత ఏర్పాట్లు చేసినట్లు పేర్కొన్నారు. జిల్లా కేంద్రంలోని ప్రధాన కూడలిల వద్ద పరీక్ష కేంద్రాలకు సంబంధించి మార్గనిర్దేశం కోసం సూచన బోర్డులను ఏర్పాటు చేసినట్లు తెలిపారు. పరీక్షలకు హాజరవుతున్న అభ్యర్థులు కేంద్రాలకు చేరుకునే సమయంలో ఏమైనా ఇబ్బందులు ఎదురైతే డయల్ 100 కు కాల్ చేయాలని సూచించారు. అభ్యర్థులు నియమ నిబంధనలు పాటించి అధికారులకు సహకరించాలని కోరారు.