జూన్ 27న రానున్న ‘కల్కి 2898 ఏడీ’ సినిమా ద్వారా మరో మరపురాని పాత్రతో ప్రేక్షకులను అచ్చెరువొందించనున్నారు కమల్‌హాసన్. దానికన్నా ముందే సేనాపతిగానూ సందడి చేయనున్నారాయన. కమల్ కథానాయకుడిగా శంకర్ తెరకెక్కించిన ‘భారతీయుడు 2’ చిత్రం జూలై 12న తెరమీదికి రానున్న సంగతి తెలిసిందే. ఈ మేరకు రేపు (మంగళవారం) ట్రైలర్ విడుదల చేయనున్నట్టు సామాజిక మాధ్యమాల ద్వారా ప్రకటించిన చిత్ర బృందం, సేనాపతితో పాటు సరికొత్త ప్రపంచంలోకి అడుగుపెట్టండి అంటూ ప్రేక్షకులకు ఆహ్వానం పలికారు.

సినిమాల్లో మానవీయ భావోద్వేగాలతో పాటు, అత్యాధునిక సాంకేతికతకి పెద్ద పీట వేస్తారు దర్శకుడు శంకర్. అటువంటి హంగులతోనే ముస్తాబు చేసిన ఈ సినిమాలో నెడుమూడి వేణు, ఎస్.జె.సూర్య, బ్రహ్మానందం, సిద్ధార్థ్, రకుల్ ప్రీత్ వంటి నటీనటులు భాగమయ్యారు. అయితే వారు ఏ పాత్రల్లో కనపడ నున్నారన్న ప్రశ్నకు ఈ ట్రైలర్ కొంతవరకు సమాధానం ఇవ్వనుంది. లైకా ప్రొడక్షన్స్, రెడ్ గెయింట్ మూవీస్ సంస్థల నుండి వస్తున్న ఈ సినిమాకి అనిరుధ్ సంగీత దర్శకుడు.