రూ.3 లక్షలు అప్పగింత

పెబ్బేర్, నవంబర్ 23: రూ.3 లక్షల నగదును కంపెనీ సభ్యులకు అందజేసి 108 సిబ్బంది నిజాయతీని చాటుకన్నారు. అనంతపురం జిల్లా మదనపల్లి నుంచి వ్యాన్‌లో శుక్రవారం టమాట లోడ్‌ను హైదరాబాద్‌కు డ్రైవర్ ఇంతియాజ్ తీసుకెళ్లాడు. అదే రోజు రాత్రి తిరిగి వస్తున్న క్రమంలో పెబ్బేర్ 44వ జాతీయ రహదారిపై రాత్రి 10.30 గంటలకు ముందుగా వెళ్తున్న టిప్పర్‌ను వ్యాన్ ఢీకొట్టింది.

ఈ ప్రమాదంలో డ్రైవర్ ఇంతియాజ్ స్టీరింగ్ మధ్యలో ఇరుక్కున్నాడు. 108 సిబ్బంది ఖాజా, మహమ్మద్ దాదాపుగా 20 నిమిషాల పాటు శ్రమించి అతడ్ని బయటకు తీసి స్థానిక ప్రభుత్వ ఆసుపత్రికి తరలించారు. డ్రైవర్ వద్ద ఉన్న రూ.3 లక్షల నగదును టమాట లోడ్ కంపెనీకి చెందిన నారాయణస్వామికి అందజేశారు. దీంతో 108 సిబ్బందిని పలువురు అభినందించారు.