1. కార్తీకమాసంలో అరుణాచలం, పంచారామాలకు ప్రత్యేక ప్యాకేజీలు
2. టీజీఎస్‌ఆర్టీసీ ఎండీ వీసీ సజ్జనార్

హైదరాబాద్, నవంబర్ 2 (విజయక్రాంతి): కార్తీక మాసంలో ప్రసిద్ధ శైవక్షేత్రాలకు భక్తుల సౌకర్యార్థం ప్రత్యేక బస్సులను ఏర్పాటు చేస్తున్నట్లు టీజీఎస్‌ఆర్టీసీ ఎండీ వీసీ సజ్జన్నార్ తెలిపారు. శ్రీశైలం, వేములవాడ, కీసరగుట్ట, తదితర దేవాలయాలకు హైదరాబాద్ నుంచి స్పెషల్ బస్సులను నడుపుతున్నామని ఆయన పేర్కొన్నారు.

ఆర్టీసీ పనితీరు, కార్తీకమాసం ఛాలెంజ్, శబరిమల ఆపరేషన్స్, మహాలక్ష్మి- మహిళలకు ఉచిత బస్సు సౌకర్య పథకం, తదితర అంశాలపై హైదరాబాద్ బస్ భవన్ నుంచి శనివారం వర్చువల్‌గా సమీక్షా సమావేశాన్ని ఏర్పాటు చేశారు. ఆర్టీసీకి కార్తీక మాసం, శబరిమల ఆపరేషన్స్ ఎంతో కీలకమని, భక్తులకు అసౌకర్యం కలగకుండా తగు చర్యలు తీసుకోవాలని అధికారులకు సూచించారు.

ఆది, సోమవారాలు శైవక్షేత్రాలకు భక్తుల రద్దీ ఎక్కువగా ఉంటుందని, అందుకు అనుగుణంగా ప్రత్యేక బస్సులను అందుబాటులో ఉంచాలని ఆదేశించారు. ఈ నెల 15న కార్తీక పౌర్ణమి నేపథ్యంలో తమిళనాడులోని అరుణాచలానికి ప్రత్యే క ప్యాకేజీని అందిస్తున్నామని తెలిపారు. ఆంధ్రప్రదేశ్‌లోని పంచారామాలకు ప్రతి సోమవారం ప్రత్యేక బస్సులను నడుపుతున్నట్లు వివరించారు.

ఈ ప్రత్యేక బస్సుల్లో ముందస్తు రిజర్వేషన్‌ను tgsrtcbus.in వెబ్‌సైట్‌లో చేసుకోవాలన్నారు. వివరాలకు ఆర్టీసీ కాల్ సెంటర్ నంబర్లు 040--69440000, 040 సంప్ర దించాలని సూచించారు. అద్దె ప్రాతిపదికన ఆర్టీసీ బస్సు చార్జీలను తగ్గించినట్లు ఎండీ తెలిపారు.

పల్లెవెలుగు కి.మీ.కు రూ.11, ఎక్స్‌ప్రెస్ రూ.7, డీలక్స్ రూ.8, సూపర్ లగ్జరీ రూ.6, రాజధాని రూ.7 మేర తగ్గించినట్లు పేర్కొన్నారు. శబరిమలకు, శుభముహుర్తాలకు అద్దెకు ఆర్టీసీ బస్సు లను బుకింగ్ చేసుకుని క్షేమంగా గమ్యస్థానాలకు చేరుకోవాలని సూచించారు. సీవోవో రవీందర్, ఈడీలు మునిశేఖర్, వినోద్ కుమార్, ఆర్‌ఎంలు, డీఎంలు, ఇతర అధికారులు పాల్గొన్నారు.