మణుగూరు,(విజయక్రాంతి): భద్రాద్రి కొత్తగూడెం జిల్లా అశ్వాపురం మండలం మారుమూల గిరిజన ప్రాంతమైన వేములూరులో పోలీసుల ఆధ్వర్యంలో రోటరీ క్లబ్ భద్రాచలం వారి సౌజన్యంతో‌ ఏర్పాటు చేసిన ఉచిత మెగా వైద్య శిబిరాన్ని భద్రాద్రి కొత్తగూడెం జిల్లా ఎస్పీ రోహిత్ రాజ్ ఆదివారం ప్రారంభించారు. ఈ సందర్భంగా ఎస్పీ రోహిత్ రాజ్ మాట్లాడుతూ... అన్ని విభాగాలలో నిపుణులైన వైద్యుల బృందం సహాయంతో వివిధ రకాల అనారోగ్య సమస్యలతో బాధపడుతున్న వారికి ఉచితంగా వైద్య చికిత్సలు నిర్వహించి మందులు పంపిణీ జరుగుతుందని తెలిపారు. స్వచ్ఛంద సంస్థలు మారుమూల ప్రాంత ప్రజలకు సేవలు అందించడానికి తరలి రావాలని కోరారు. జిల్లాలోని ఏజెన్సీ ప్రాంత ప్రజల అభివృద్ధి,సంక్షేమం కొరకు ఎల్లప్పుడూ కృషి చేయడమే జిల్లా పోలీసుల ప్రధాన లక్ష్యమన్నారు.అనంతరం మెగా వైద్య శిబిరంలో సేవలందించిన వైద్యులను ఎస్పీ సన్మానించారు. ఈ కార్యక్రమంలో మణుగూరు డిఎస్పీ రవీందర్ రెడ్డి,సిఐ అశోక్ రెడ్డి, పోలీస్ సిబ్బంది పాల్గొన్నారు.