న్యూఢిల్లీ: టీ20 ప్రపంచకప్‌లో పాకిస్థాన్‌తో జరిగిన మ్యాచ్‌లో భారత బ్యాటింగ్‌లో నిర్లక్ష్యం కనిపించిందని క్రికెట్ దిగ్గజం సునీల్ గవాస్కర్ అభిప్రాయపడ్డాడు. మ్యాచ్‌లో దాయాదిపై విజయం సాధించినప్పటికీ షాట్ల ఎంపిక తీవ్ర నిరాశకు గురి చేసిందని గవాస్కర్ వ్యాఖ్యానించాడు. ‘టీమిండియా బ్యాట ర్ల ప్రదర్శన తీవ్ర నిరాశకు గురి చేసింది. ప్రతి బంతిని సులువుగా కొట్టేస్తామన్న అహంభావంతో ఆడి మనవాళ్లు దెబ్బతిన్నారు. పాక్ వంటి అనుభవం కలిగిన ప్రమాదకర బౌలింగ్ యూనిట్‌ను ఎదుర్కొనేటప్పుడు జాగ్రత్తగా ఉండాలి.

మరో ఓవర్ మిగిలి ఉండగానే టీమిండియా ఆలౌట్ కావడం బాధపెట్టే అంశం. ముఖ్యంగా షాట్ల ఎంపికలో నిర్లక్ష్యం కొట్టొచ్చినట్లు కనిపించింది. మ్యాచ్‌ను తేలికగా తీసుకున్నట్లు అనిపించింది. కనీసం మరో 10 పరుగులు చేసి ఉంటే ప్రత్యర్థిపై బలమైన ఒత్తిడి తీసుకురాగలిగే వాళ్లం. అయితే మన బౌలర్లు అద్భుత ప్రదర్శనతో జట్టును గెలిపించారు. రానున్న మ్యాచ్‌ల్లో బ్యాటింగ్‌పై శ్రద్ద పెట్టాల్సిన అవసరముంది’ అని సన్నీ పేర్కొన్నాడు.