జబల్‌పూర్: మధ్యప్రదేశ్‌లోని జబల్‌పూర్ జిల్లా(Jabalpur district)లో సోమవారం ఉదయం ప్రయాగ్‌రాజ్ నుండి వేగంగా వస్తున్న జీపు ఒక ప్రైవేట్ బస్సును ఢీకొట్టడంతో ఆరుగురు మృతి చెందగా, ఇద్దరు గాయపడ్డారని ఒక అధికారి తెలిపారు. ఖితౌలా పోలీస్ స్టేషన్ పరిధిలోని పహ్రేవా గ్రామం సమీపంలో ఈ సంఘటన జరిగిందని జబల్‌పూర్ కలెక్టర్ దీపక్ సక్సేనా తెలిపారు. కర్ణాటక రిజిస్ట్రేషన్(Karnataka via Jabalpur) కలిగిన జీపు ఉత్తరప్రదేశ్‌లోని ప్రయాగ్‌రాజ్ నుండి తిరిగి వస్తుండగా ఈ సంఘటన జరిగిందని కలెక్టర్ దీపక్ సక్సేనా పేర్కొన్నారు. జీపు డ్రైవర్ నియంత్రణ కోల్పోయాడు.

దీంతో వాహనం మొదట రోడ్డు డివైడర్‌పై ఉన్న చెట్టును ఢీకొట్టి, ఆపై హైవేకి అవతలి వైపుకు దూకి, ఎదురుగా వస్తున్న బస్సును ఢీకొట్టిందని ఆయన చెప్పారు. ఈ దుర్ఘటనలో ఆరుగురు వ్యక్తులు అక్కడికక్కడే మరణించారు. మరో ఇద్దరు గాయపడ్డారు. క్షతగాత్రులను సిహోరా పట్టణంలోని వైద్య కేంద్రంలో ప్రాథమిక చికిత్స తర్వాత జబల్‌పూర్ వైద్య కళాశాలకు పంపించారని అధికారి తెలిపారు. బాధితులు ప్రయాగ్‌రాజ్(Prayagraj) నుండి తిరిగి వచ్చి జబల్‌పూర్ మీదుగా కర్ణాటక వైపు వెళుతున్నారని చెప్పారు. ప్రమాదం జరిగిన అనంతరం బస్సు డ్రైవర్ తన వాహనంతో పాటు అక్కడి నుండి వెళ్లిపోయాడని, ప్రస్తుతం సీసీ కెమెరాల ఆధారంగా బస్సును కనుగొనే ప్రయత్నాలు కొనసాగుతున్నాయని ఒక పోలీసులు తెలిపారు. ప్రమాదంపై సమాచారం అందుకున్న వెంటనే కలెక్టర్‌, పోలీసు సూపరింటెండెంట్‌ సంఘటనా స్థలానికి చేరుకున్నారు.