డా. సాయి వెంకట్ నటిస్తూ దర్శకత్వం వహిస్తున్న సినిమా ‘జయహో రామానుజ’. ఈ చిత్రాన్ని సుదర్శనం ప్రొడక్షన్స్ బ్యానర్‌లో సాయిప్రసన్న, ప్రవళ్లిక నిర్మిస్తున్నారు. అమెరికా నటి జో శర్మ హీరోయిన్ గా నటిస్తుండగా సుమన్, ప్రవళ్లిక ఇతర కీలక పాత్రల్లో కనిపించనున్నారు. రెండు భాగాలుగా చిత్రీకరణ జరుపుకుంటున్న ఈ సినిమా తొలి భాగం జూలై 12న తెలుగు, తమిళ, కన్నడ, మలయాళ, హిందీ, సంస్కృత భాషల్లో ప్రేక్షకుల ముందుకు రానుంది. ఈ నేపథ్యంలో చిత్ర బృందం శనివారం ‘జయహో రామానుజ’ లిరికల్ సాంగ్స్ విడుదల కార్యక్రమాన్ని హైదరాబాద్‌లోని ప్రసాద్ ల్యాబ్స్‌లో నిర్వహించారు.

ఈ సందర్భంగా లయన్ సాయి వెంకట్ మాట్లాడుతూ “ఇటీవల మా సినిమా పాటలను మంత్రివర్యులు పొన్నం ప్రభాకర్, దామోదర రాజనరసింహా, కోమటిరెడ్డి వెంకటరెడ్డి లకు చూపించగా, పాటలన్నీ తమకు బాగా నచ్చాయంటూ వారు ప్రశంసించారు. సంగీత సాహిత్యాలు గొప్పగా ఉండాలని ప్రత్యేక శ్రద్ధ తీసుకుని పాటల రూపకల్పన చేశాం. కుల మతాలకు అతీతంగా మానవాళి ఐకమత్యంతో ఉండాలని సందేశాన్ని ఇచ్చిన భగవత్ శ్రీ రామానుజాచార్యుల గొప్పదనం ఈ తరం వారికి తెలియాలనే ఉద్దేశంతో ఈ చిత్రాన్ని రూపొందించాను” అని తెలిపారు. ఈ కార్యక్రమానికి నిర్మాతలు ప్రసన్నకుమార్ మరియు తుమ్మలపల్లి రామసత్యనారాయణ, దర్శకుడు వీరశంకర్, ఎఫ్ డీసీ మాజీ ఛైర్మన్ అనిల్ కుర్మాచలం అతిథులుగా హాజరై చిత్ర బృందానికి శుభాకాంక్షలు తెలిపారు.