బాలీవుడ్ నటి రియా చక్రవర్తి కొంత కాలంగా ఓ పాడ్‌కాస్ట్ నిర్వహిస్తూ తనదైన శైలిలో ప్రేక్షకులను ఆకట్టుకుంటోంది. తాజా ఈ కార్యక్రమంలో స్టార్ నటుడు ఆమిర్ ఖాన్ పాల్గొన్నారు. ఈ సందర్భంగా ఆమిర్ నటించిన ‘లాల్ సింగ్ చడ్డా’కు సంబంధించిన ఆసక్తికర విషయాన్ని రియా తెలిపింది. ఆ సినిమాలో కరీనా కపూర్ పోషించిన పాత్ర కోసం నిర్వహించిన ఆడిషన్స్‌లో తాను పాల్గొన్నానని గుర్తు చేసింది. “ఆమిర్ నటించిన ‘లాల్ సింగ్ చడ్డా’ చిత్రంలో కరీనా పాత్ర కోసం మొదట నేనే ఆడిషన్ ఇచ్చా. కానీ ఎందుకో సెలక్ట్ కాలేదు. చాలా సినిమాలకు ఆడిషన్స్ ఇచ్చిన నేను ఆ ఆడిషన్‌ను మాత్రం ఎప్పటికీ మర్చిపోలేను. స్క్రీన్ టెస్టులో నా నటనను చూసిన ఆమిర్ ఖాన్ ‘క్షమించండి.. ఈ పాత్రకు మీరు ఎంపిక కాలేదు.

అయినా మీ నటన చాలా బాగుంది’ అంటూ మెస్సేజ్ పంపించారు. ఆ సందేశాన్ని చూసి నిజంగా షాక్ అయ్యా. దాన్ని మా అమ్మానాన్నలకు చూపించి.. ‘చూడండి నా నటన బాగుందని స్వయంగా ఆమిర్ ఖాన్ మెచ్చుకున్నారు’ అంటూ బాగా సంబరపడిపోయా..’ అంటూ అప్పటి విషయాన్ని నెమరు వేసుకుంది రియా. ఇంకా చెప్తూ.. ‘లాల్ సింగ్ చడ్డా’ కంటే ముందు చాలా సినిమాలకు ఆడిషన్స్ ఇచ్చిన తనకు నిర్మాతలు, దర్శకులు ఎవరూ ఇలా చెప్పలేదంటూ అప్పటి సంగతుల్ని పంచుకోగా, ఆమిర్ స్పందించారు. ‘నటీనటులకు కెరీర్ తొలినాళ్లలో చాలా తిరస్కరణలు ఎదురవుతాయి. ఆడిషన్స్ ఇచ్చిన తర్వాత ఒకవేళ ఆ పాత్ర రాకపోతే ఆ విషయం వాళ్లకు చెప్పాలి. ఎందుకంటే నేను పరిశ్రమకు వచ్చిన మొదట్లో చాలా ఆడిషన్స్ ఇచ్చి అవకాశం కోసం ఎదురుచూసేవాణ్ని. తీరా ఆ పాత్రకు వేరేవాళ్లు ఎంపికయ్యారన్న సంగతి మీడియాలో వస్తే తప్ప నాకు తెలిసేది కాదు” అంటూ ఆమిర్ కూడా కెరీర్ తొలి రోజులను గుర్తు చేసుకున్నారు.