హైదరాబాద్, ఖేల్ ప్రతినిధి: పారా ఐటీఎఫ్ జాతీయ జూనియర్, సబ్ జూనియర్ చాంపియన్‌షిప్‌లో తెలంగాణకు చెందిన జోహన్ని షిజు రజత పతకంతో మెరిసింది. గచ్చిబౌలీ వేదికగా జరిగిన ట్రయథ్లాన్ పోటీల సబ్ జూనియర్ కేటగిరీలో షిజు స్విమ్మింగ్‌లో 5.46 సెకన్లు, టీ1 0.52 సెకన్లు, సైక్లింగ్ 15.48 సెకన్లు, టీ2 0.37 సెకన్లు, రన్నింగ్ 11.54 సెకన్ల టైమింగ్‌తో రెండో స్థానంలో నిలిచింది. ఓవరాల్‌గా షిజు రేసును 34 నిమిషాల 54 సెకన్లలో పూర్తి చేసింది. మణిపూర్‌కు చెందిన నెల్సీ (32 నిమిషాల 39 సెకన్లు), మహారాష్ట్రకు చెందిన ఇషా (36 నిమిషాల 27 సెకన్లు) వరుసగా స్వర్ణ, కాంస్యాలు దక్కించుకున్నారు. శనివారం ప్రభుత్వ విప్ బీర్ల ఐలయ్య విజేతలకు బహుమతులు అందజేశారు.