కోల్‌కతాకు సమీపంలోని నల్పూర్ స్టేషన్ వద్ద ఘటన

హైదరాబాద్, నవంబర్ 9: సికింద్రాబాద్ - శాలిమార్ ఎక్స్‌ప్రెస్ రైలుకు ప్రమాదం తప్పింది. శనివారం ఈ వీక్లీ స్పెషల్ రైలుకు చెందిన మూడు బోగీలు పట్టాలు తప్పాయి. కాగా ఘటనలో ప్రాణనష్టం జరగలేదని సౌత్ రైల్వే సీపీఆర్‌వో తెలిపారు. కోల్‌కతాకు 40 కిలోమీటర్ల దూరంలో ఉన్న నల్పూర్ స్టేషన్ సమీపంలో ఈ ఘటన జరిగింది. రైలు మధ్య ట్రాక్ నుంచి బయట ట్రాక్‌కు మారుతుండగా బోగీలు పట్టాలు తప్పాయి. వీటిలో 2 ప్రయాణికుల బోగీలు కాగా.. ఒకటి పార్సిల్ బోగి ఉంది. సమాచారం అందుకున్న అధికారులు హుటా హుటిన ఘటనా స్థలానికి చేరుకుని సహాయక చర్యలు అందించారు.