ఎలక్ట్రానిక్  వాహనాలకు మారాలె

రిజిస్ట్రేషన్ చార్జీలు, రోడ్ టాక్సులు తీసుకోం

హైబ్రిడ్ వాహనాలకు కూడా పన్ను రాయితీ 

రాష్ట్రంలో మరో ఐదు సెట్విన్ ట్రైనింగ్ సెంటర్లు

రవాణా శాఖ మంత్రి పొన్నం ప్రభాకర్

హుస్నాబాద్, నవంబర్ 19: పదిహేనేండ్లు దాటిన వెహికిల్స్‌ను స్వచ్ఛందంగా స్క్రాప్‌కు పంపాల్సిందేనని రవాణా శాఖ మంత్రి పొన్నం ప్రభాకర్ స్పష్టం చేశారు. రాష్ట్రంలో కాలుష్యాన్ని తగ్గించేందుకు ప్రభుత్వం వాహనాల స్క్రాప్ పాలసీ తీసుకొచ్చిందని, దానిని అమలు చేసేందుకు కఠినంగా వ్యవహరిస్తామని అన్నారు. మంగళవారం ఆయన సిద్దిపేట జిల్లా హుస్నాబాద్‌లోని బుడిగజంగాల కాలనీలో ఇందిరమ్మ విగ్రహ నిర్మాణానికి శంకుస్థాపన చేశారు.

మున్సిపల్ కాంప్లెక్స్‌లో సెట్విన్ ట్రైనింగ్ సెంటర్‌ను ప్రారంభించారు. అనంతరం విశాల పరపతి సహకార సంఘం ఆఫీస్ బిల్డింగ్, గోదాంతోపాటు హుస్నాబాద్ మాజీ ఎమ్మెల్యే బొప్పరాజు లక్ష్మీకాం తారావు విగ్రహాన్ని ఆవిష్కరించారు. అనంతరం జరిగిన సమావేశంలో మాట్లాడుతూ ఢిల్లీలో కాలుష్యం ప్రమాదకర స్థాయిలో పెరిగిపోవడంతో అక్కడ స్కూళ్లను బంద్ చేసే పరిస్థితి వచ్చిందన్నారు. హైదరాబాద్‌లో ఆ పరిస్థితి రాకుండా చర్యలు తీసుకుంటున్నట్టు చెప్పారు.

ఇందుకోసం ఈవీ పాలసీని తీసుకొచ్చామన్నారు. పదిహేనేండ్లు దాటిన వాహనాలను స్క్రాప్‌కు వేయాల్సిందేనని, దీనిపై రవాణా శాఖ ఎన్‌ఫోర్స్‌మెంట్ అధికారులు కఠినంగా వ్యవహరించి కాలుష్యాన్ని వెదజల్లే వాహనాలను సీజ్ చేయాలని సూచించారు. ఈవీలను వాడుతూ కాలుష్యాన్ని తగ్గించుకుందామని పిలుపునిచ్చారు. ఈ వెహికిల్స్‌పై రిజిస్ట్రేషన్ చార్జీలు, రోడ్డు టాక్సులు పూర్తిగా రద్దు చేశామని పేర్కొన్నారు. దీంతో ఒక్కరోజులోనే 113 వాహనాలు రిజిస్ట్రేషన్ అయ్యాయని తెలిపారు. అంతకుముందు రోజుకు ఐదు వాహనాలు కూడా రిజిస్ట్రేషన్ కాలేదన్నారు. హైబ్రిడ్ వాహనాలపై కూడా పన్ను రాయితీ కల్పించే ఆలోచనలో ఉన్నామన్నారు.