ఎన్టీఆర్ టైటిల్ రోల్‌లో నటిస్తున్న చిత్రం ‘దేవర’. కొరటాల శివ దర్శకత్వం వహిస్తున్న ఈ సినిమాను మిక్కిలినేని సుధాకర్, హరికృష్ణ.కె నిర్మిస్తున్నారు. మంగళవారం ఈ మూవీ ట్రైలర్ విడుదలైంది. ముంబయి లో జరిగిన ట్రైలర్ లాంచ్ ఈవెంట్‌కు నిర్మాత కరణ్ జోహార్, అనిల్ తడాని సహా పలువురు ప్రముఖులు హాజరయ్యారు. ప్రకాశ్‌రాజ్ గంభీరమైన వాయిస్ ఓవర్‌తో ట్రైలర్ ప్రారంభమైంది. ఓడలను దోచుకుంటూ రక్తపాతాన్ని సృష్టించే భైరా (సైఫ్ అలీఖాన్) ముఠా నుంచి ఓ తీరప్రాంత గ్రామాన్ని రక్షించే పవర్‌ఫుల్ పాత్ర దేవరగా ఎన్టీఆర్‌ను పరిచయం చేసిన తీరు మెప్పించింది.

ఎన్టీఆర్ ద్విపాత్రాభినయాన్ని ట్రైలర్‌లో చూడొచ్చు. భయానికి అర్థం చెప్పే ప్రతిరూపమైన పాత్ర ఒకటైతే.. భయపడుతూ ఉండే మరో పాత్రలో ఎన్టీఆర్ కనిపించనున్నారని తెలుస్తోంది. ఎన్టీఆర్, సైఫ్ మధ్య సన్నివేశాలు సినిమాపై అంచనాలు పెంచేలా ఉన్నాయి. ఎన్టీఆర్, జాన్వీ మధ్య సన్నివేశాల్లో వారి మధ్య కెమిస్ట్రీ పండినట్టు తెలుస్తోంది. ప్రపంచ వ్యాప్తంగా సెప్టెంబర్ 27న తెలుగు, హిందీ, తమిళ, కన్నడ, మలయాళ భాషల్లో రిలీజ్ కానుందీ చిత్రం.