సంయుక్త మీనన్.. టాలీవుడ్ ప్రేక్షకులకు పరిచయం అక్కర్లేని హీరోయిన్. మొదటి సినిమానే స్టార్ హీరోతో చేసే అవకాశం దక్కించుకుందీ ముద్దుగుమ్మ. పవన్ కల్యాణ్ ‘భీమ్లా నాయక్’తో టాలీవు డ్‌లో అడుగుపెట్టిన ఈ భామ తొలి సినిమాతోనే భారీ విజయాన్ని తన ఖాతాలో వేసుకుంది. తర్వాత వరుసగా నటించిన మూడు సినిమాలూ హిట్ టాక్ సొంతం చేసుకోవటంతో అనతి కాలంలోనే స్టార్ హీరోయిన్స్ జాబితాలో చేరిపోయింది. నిరుడు ‘విరూపాక్ష’, ‘సార్’ చిత్రాలతో విజయాలను ఖాతాలో వేసుకున్న సంయుక్త మీనన్ త్వరలో టాలీవుడ్ హీరో నిఖిల్ సరసన ‘స్వయంభు’లో కనిపించనున్నది.

శర్వానంద్ కొత్త చిత్రంలోనూ హీరోయిన్‌గా నటిస్తున్నది. ఇలా టాలీవుడ్‌లో బిజీగా ఉన్న ఈ అమ్మడు బాలీవుడ్‌లోనూ బంపర్ ఆఫర్ కొట్టేసింది. చరణ్ తేజ్ ఉప్పలపాటి దర్శకత్వంలో కాజోల్ లీడ్ రోల్ పోషిస్తున్న బాలీవుడ్ సినిమాలో అవకాశం దక్కించుకున్నది. ‘మహారాజ్ఞి’ పేరుతో తెరకెక్కుతున్న ఈ చిత్రంలో ప్రభుదేవాతోపాటు నసీరుద్దీన్ షా వంటి వారు కూడా నటిస్తున్నారు. తాజాగా శనివారం ‘మిడ్ డే షో ఐకాన్స్ సౌత్ క్రాస్ ఓవర్ అవార్డును అందుకున్నది. దీంతో అభిమానులు ఆమెపై ప్రశంసల వర్షం కురిపిస్తున్నారు.