దర్శకుడిగా ఎంతో మంచి పేరు సంపాదించుకున్న సముద్రఖని, ప్రస్తుతం నటుడిగా కూడా అన్ని భాషల ప్రేక్షకుల అభిమానాన్ని సొంతం చేసుకుంటున్నారు. టాలీవుడ్‌లో అల వైకుంఠపురములో’, క్రాక్’, హనుమాన్’ వంటి తెలుగువారికి చేరువయ్యారు. తాజాగా ఆయన మిస్టర్ మాణిక్యం’ చిత్రంతో ప్రేక్షకుల ముందుకు వస్తున్నారు. డిసెంబర్ 28న ఈ చిత్రం విడుదల కానున్న నేపథ్యంలో ప్రముఖ నిర్మాత, డిస్ట్రిబ్యూటర్ ఏషియన్ సునీల్ నారంగ్ చేతుల మీదుగా సినిమా ఫస్ట్ లుక్‌ను, రిలీజ్ డేట్ పోస్టర్‌ను ఆదివారం చిత్రబృందం రిలీజ్ చేయించింది. ఈ కార్యక్రమంలో నిర్మాత శివలెంక కృష్ణప్రసాద్ అతిథిగా పాల్గొన్నారు.

ఈ సందర్భంగా ప్రధాన పాత్రధారి సముద్రఖని మాట్లాడుతూ.. విమానం’ తర్వాత నేను ప్రధాన పాత్రలో నటించిన సినిమా ఇది. విమానం’ నాకు మంచి పేరు తెచ్చింది. ఈ సినిమా అంతకు మించిన మంచి పేరు తెస్తుందన్న నమ్మకం ఉంది. మానవతా విలువలు ప్రధానాంశంగా రూపొందిన సినిమా ఇది’’ అన్నారు. ఈ సినిమాలో కథానాయకుడి భార్యగా అనన్య నటించారు. ఇతర ప్రధాన పాత్రల్లో సీనియర్ దర్శకుడు భారతీరాజా, నటుడు నాజర్ కనిపించనున్నారు. తంబి రామయ్య, ఇళవరసు, తరుణ్, కరుణాకరన్, చిన్ని జయంత్, వడివుక్కరసి కీలక పాత్రల్లో నటించారు. ఈ చిత్రానికి  కూర్పు: ఎస్పీ రాజా సేతుపతి; కళ: సాగు; స్టంట్స్: దినేశ్; ఛాయాగ్రహణం: ఎం సుకుమార్; సంగీతం: విశాల్ చంద్రశేఖర్; నిర్మాతలు: జీపీ రేఖా రవికుమార్, చింతా గోపాలకృష్ణారెడ్డి, రాజా సెంథిల్; దర్శకత్వం: నంద పెరియసామి.