నిందితుడి అరెస్ట్

హైదరాబాద్ సిటీబ్యూరో, నవంబర్ 5 (విజయక్రాంతి): కల్తీ కారం పొడిని బ్రాండెడ్ కంపెనీల పేర్లతో ప్యాకింగ్ చేసి అమ్ముతున్న వ్యక్తిని హైదరాబాద్ సెంట్రల్ జోన్ టాస్క్‌ఫోర్స్ పోలీసులు అదుపులోకి తీసుకున్నారు. పోలీసుల కథనం ప్రకారం.. విశ్వసనీయ సమాచారం మేరకు అఫ్జల్‌గంజ్ పీఎస్ పరిధి ఉస్మాన్‌గంజ్  ఏరియాలోని ఓ ఇంటిపై దాడి చేసిన సెంట్రల్‌జోన్ టాస్క్‌ఫోర్స్ పోలీసులు రూపారం కాట్రీ అలియాస్ రూపేష్ కారం కల్తీ చేస్తున్నట్లు గుర్తించారు. మంగళవారం అతడిని అరెస్ట్ చేసి రూ. 4 లక్షల విలువైన కల్తీ కారం పొడితో పాటు కల్తీకి వాడే సరుకులను స్వాధీనం చేసుకున్నారు. కారం ఎర్రగా కనిపించేందుకు, తూకం వచ్చేందుకు ఎరుపు రంగు, విషపూరిత రంగులు, నూనెలు కలుపుతున్నట్లు పోలీసులు గుర్తించారు. నిందితుడిపై  కేసు నమోదు చేసి కోర్టులో హాజరుపరిచారు.