న్యూఢిల్లీ, అక్టోబర్ 18: రష్యా అధ్యక్షుడు పుతిన్ అనారోగ్యంతో ఉన్నారన్న వార్తలు  వ్యాపిస్తున్నాయి. తాజాగా అక్కడి మీడియాల్లో పుతిన్ ఆరోగ్య పరిస్థితిపై కథనాలు వెలువడ్డాయి. కాగా అధ్యక్ష భవనం క్రెమ్లిన్ ఈ వార్తలను ఖండించింది. తాజాగా అధ్యక్షుడు పుతిన్, ఆరోగ్య మంత్రి మిఖాయిల్ ముర్కాష్కాతో కలిసి ఫ్లూ వ్యాక్సినేషన్‌లపై నిర్వహించిన అవగాహన కార్యక్రమంలో పాల్గొని ఓ వార్తాసంస్థతో మాట్లాడారు. ‘నేను సెంట్రల్ క్లినికల్ హాస్పిటల్‌లో అన్ని రకాల వైద్య పరీక్షలు చేయించుకున్నా. దేశీయంగా ఉత్పత్తి చేసిన మందులతో టీకాలు వేయమని సిఫార్సు చేస్తున్నా’ అని పుతిన్ వ్యాఖ్యానించారు. ఈ నేపథ్యంలో ఆయన ఆరోగ్య సమస్యలతో బాధపడుతున్నట్లు సోషల్ మీడియాలో వార్తలు వ్యాపిస్తున్నాయి.