దౌల్తాబాద్ (విజయక్రాంతి): ఆర్టీసీ బస్సు ప్రయాణం ప్రయాణికులకు ఎంతో సురక్షితమని ఆర్టీసీ విబిఓ అధికారులు ఆర్ పి రెడ్డి, దేవేందర్ రెడ్డిలు అన్నారు. శనివారం రాయపోల్ మండలం పెద్ద ఆరేపల్లి గ్రామంలో గజ్వేల్ ప్రజ్ఞాపూర్ డిపో ఆధ్వర్యంలో వికలాంగులకు ఆర్టీసీ రాయితీపై బస్సు పాసులను అందజేశారు. ఈ సందర్భంగా వారు మాట్లాడుతూ.. ప్రయాణికులకు ఎలాంటి ఇబ్బందులు లేకుండా ఆర్టీసీ అన్ని సౌకర్యాలు కల్పిస్తుందని అన్నారు.

ప్రైవేట్ వాహనాల్లో వెళ్లకుండా ప్రజలు ఆర్టీసీని వినియోగించుకోవాలని సూచించారు. ఆర్టీసీ ప్రజలకు ఎన్నో సదుపాయాలు కల్పిస్తుందని, ముఖ్యంగా వికలాంగులకు, విద్యార్థులకు బస్సు పాసులు, మహిళలకు ఉచిత ప్రయాణంతో పాటు వివిధ ప్రాంతాలకు వెళ్లి ప్రయాణికులకు ఎలాంటి ఇబ్బందులు లేకుండా ఆర్టీసీ వివిధ రూట్లలో బస్సులను నడిపిస్తుందని దీంతో ప్రయాణికులకు ఎంతో సౌకర్యంగా ఉంటుందని వారు పేర్కొన్నారు. ఆర్టీసీ బస్సులో ప్రయాణించి గమ్యస్థానాలకు చేరుకోవడానికి ఎంతో ఉపయోగకరంగా ఉంటుందన్నారు. ప్రైవేట్ వాహనాలను ఆశ్రయించకుండా ప్రజలందరూ ఆర్టీసీ బస్సులను ఆదరించాలని పేర్కొన్నారు. ఈ కార్యక్రమంలో గ్రామ మాజీ ఉప సర్పంచ్ కిరణ్ కుమార్, తదితరులు పాల్గొన్నారు.