హైదరాబాద్,(విజయక్రాంతి): తెలంగాణ రాష్ట్రంలో సవరించిన ఓటర్ల జాబితా(Revised Voters List) కేంద్ర ఎన్నికల సంఘం సోమవారం విడుదల చేసింది.  రాష్ట్రంలో మొత్తం ఓటర్ల సంఖ్య 3,35,27,925 ఉండగా, ఇందులో 1,66,41,489 మంది పురుష ఓటర్లు, 1,68,67,735 మంది మహిళ ఓటర్లు, 2,829 మంది థర్డ్ జెండర్ ఓటర్లు ఉన్నారు. సవరణ తర్వాత సీఈవో తుది ఓటర్ల జాబితాను ప్రకటించింది. తెలంగాణ రాష్ట్రంలో 18-19 సంవత్సరాల మధ్య వయస్సు ఓటర్లు 5,45,026 మంది, 85 ఏళ్లు దాటిన సీనియర్ ఓటర్లు 2,22,091 మంది, ఎన్ఆర్ఐ ఓటర్లు 3,591 మంది, దివ్యాంగ ఓటర్లు 5,26,993 మంది ఉన్నట్లు ఎన్నికల సంఘం వెల్లడించింది. కాగా గత ఎన్నికల ముందు రాష్ట్రంలో 3,17,17,389 మంది ఓటర్లు ఉన్న విషయం తెలిసిందే. దాదాపు ఈసారి 18 లక్షల మంది ఓటర్లు ఓటు హక్కును నమోదు చేయించుకున్నారు. రాష్ట్రంలోని శేరిలిగంపల్లిలో  7,65,982 మంది ఓటర్లు అత్యధికంగా ఉండగా, భద్రాచలంలో 1,54,134 మంది ఓటర్లు అతి తక్కువగా ఉన్నట్లు సమాచారం.