ఆఫ్ఘనిస్తాన్ స్టార్ స్పిన్నర్ రషీద్ ఖాన్(Afghanistan star spinner Rashid Khan) అరుదైన మైలురాయిని సాధించాడు. T20 క్రికెట్‌లో అత్యధిక వికెట్లు తీసిన ప్రపంచ రికార్డును నెలకొల్పాడు. దక్షిణాఫ్రికాలో జరిగిన SA20 లీగ్‌లో MI కేప్ టౌన్ తరపున ఆడుతున్న రషీద్, పార్ల్ రాయల్స్‌తో జరిగిన మ్యాచ్‌లో రెండు వికెట్లు పడగొట్టాడు. దీంతో అంతర్జాతీయ టీ20లు, ఫ్రాంచైజీ లీగ్‌లలో అతని మొత్తం వికెట్ల సంఖ్య 633కి చేరుకుంది. 

వీటిలో, రషీద్ అంతర్జాతీయ T20 మ్యాచ్‌లలో ఆఫ్ఘనిస్తాన్ తరపున 161 వికెట్లు పడగొట్టాడు. అదే సమయంలో దేశీయ, ప్రపంచవ్యాప్తంగా వివిధ T20 లీగ్‌లలో 472 వికెట్లు సాధించాడు. ఇండియన్ ప్రీమియర్ లీగ్ (IPL)లో, రషీద్ ఖాన్ గుజరాత్ టైటాన్స్‌కు ప్రాతినిధ్యం వహిస్తున్నాడు. గతంలో సన్‌రైజర్స్ హైదరాబాద్ తరపున ఆడిన విషయం తెలిసిందే. వెస్టిండీస్ మాజీ ఆల్ రౌండర్ డ్వేన్ బ్రావో(Dwayne Bravo) ఇప్పుడు ఆల్ టైమ్ టీ20 వికెట్లు తీసిన జాబితాలో రెండో స్థానంలో నిలిచాడు. 582 మ్యాచ్‌లు ఆడిన బ్రావో ఈ ఫార్మాట్‌లో 631 వికెట్లు పడగొట్టాడు.