బాలీవుడ్‌లో అత్యంత ప్రతిష్టాత్మకంగా రూపొందుతున్న చిత్రం ‘రామాయణ’. బాలీవుడ్ అగ్ర నిర్మాతలతో కలిసి అల్లు అరవింద్ ఈ చిత్రాన్ని నిర్మిస్తున్నారు. ఈ సినిమా నుంచి అధికారిక ప్రకటన బుధవారం వెలువడింది. చిత్రం విడుదల తేదీలతో పాటు.. ఎన్ని భాగాలుగా రూపొందించనున్నారనే విషయాలను తెలియజేస్తూ చిత్ర బృందం ఒక పోస్టర్‌ను విడుదల చేసింది.

ఈ సినిమా 2026 దీపావళికి మొదటి భాగం, 2027 దీపావళికి రెండో భాగం విడుదల చేయనున్నట్టు తెలియజేస్తూ చిత్ర బృందం అధికారిక ప్రకటన విడుదల చేసింది. కొన్ని నెలలుగా ఈ సినిమాకు సంబంధించి ఏదో ఒక వార్త సామాజిక మాధ్యమాల్లో వైరల్ అవుతూనే ఉంది. ఈ చిత్రంలో రాముడి పాత్రలో రణబీర్, సీత పాత్రలో సాయి పల్లవి కనిపించనున్నారు.

ఈ సినిమాలో రకుల్ ప్రీత్ సింగ్ శూర్పణఖ పాత్రలో నటించనున్నారని తెలుస్తోంది. దీంతో రకుల్ ఒక్కసారిగా వార్తల్లో నిలిచారు. ప్రస్తుతం అంతటా రకుల్ గురించే చర్చ నడుస్తోంది. మిగిలిన పాత్రల గురించి దాదాపుగా ఇంతకు ముందే వార్తలొచ్చాయి.

కానీ రకుల్ గురించి తాజాగా బయటకు రావడంతో ఇప్పుడామె హైలైట్ అవుతున్నారు. అందమైన రకుల్ డీ గ్లామర్ రోల్ అయిన శూర్పణఖ పాత్రలో ఎలా ఉంటారో చూడాలని ప్రేక్షకులు భావిస్తున్నారు. రావణుడిగా యశ్, హనుమంతుడిగా సన్నీడియోల్, కైకేయిగా లారా దత్తా నటిస్తున్నట్టు తెలుస్తోంది.