లయన్ డాక్టర్ సాయివెంకట్ నటిస్తూ దర్శకత్వం వహిస్తున్న సినిమా ‘జయహో రామానుజ’. ఈ చిత్రాన్ని సుదర్శనం ప్రొడక్షన్స్‌లో సాయిప్రసన్న, ప్రవళ్లిక నిర్మిస్తున్నారు. అమెరికా నటి జో శర్మ హీరోయిన్‌గా నటిస్తుండగా సుమన్, ప్రవళ్లిక ఇతర కీలక పాత్రల్లో కనిపించనున్నారు. ఈ సినిమా త్వరలో తెలుగు, తమిళ, కన్నడ, మలయాళ, హిందీ, సంస్కృత భాషల్లో ప్రేక్షకుల ముందుకు రాబోతోంది. ఈ నేపథ్యంలో ఈ చిత్రం పాటల ఆవిష్కరణ కార్యక్రమాన్ని హైదరాబాద్‌లో నిర్వహించారు. ఈ సందర్భంగా దర్శకుడు, హీరో సాయివెంకట్ మాట్లాడుతూ.. “మన తెలుగు రాష్ట్రాల్లో రామానుజాచార్యుల గురించి పెద్దగా తెలియదు. కానీ తమిళనాట ప్రతి ఒక్కరికీ ఆయన తెలుసు.

చినజీయర్ స్వామి ఆధ్వర్యంలో మన దగ్గర ఏర్పాటుచేసిన సమతామూర్తి విగ్రహాన్ని ప్రధాని, రాష్ట్రపతి వంటి పెద్ద వాళ్లు వచ్చి ఆవిష్కరించినప్పుడు తెలుగు రాష్ట్రాల వారికి బాగా ఆయన గురించి తెలిసింది. తెలుగు ప్రజలకు రామానుజాచార్యుల వారి గొప్పదనం తెలియజేసే ప్రయత్నంలోనే ఈ చిత్రాన్ని రూపొందించాను. వేంకటేశ్వర స్వామికే గురువు లాంటి వారు రామానుజులు. వేంకటేశ్వరుడికి శంఖుచక్రాలు రామానుజాచార్యుల వారే బహూకరించారు. కమల్‌హాసన్ సామాజిక చిత్రంలో 10 పాత్రలు చేశారు. కానీ పౌరాణికంలో ఎవరూ 11 పాత్రల్లో నటించలేదు. నేను ఈ ‘జయహో రామానుజ’ చిత్రంలో 11 పాత్రలు చేసి వరల్డ్ రికార్డ్ క్రియేట్ చేస్తున్నా.

ఈ సినిమాను ప్రపంచవ్యాప్తంగా రిలీజ్ చేయాలన్న మిత్రుల సలహాతో తెలుగు, తమిళ, మలయాళ, కన్నడ, హిందీ, సంస్కృతంతో పాటు మిగతా ప్రపంచ భాషల్లో రిలీజ్ చేయబోతున్నాం” అని తెలిపారు. నిర్మాత ప్రవళ్లిక మాట్లాడుతూ.. “జయహో రామానుజ’ వంటి భారీ చిత్రాన్ని నేను నిర్మించగలను అని నమ్మి నన్ను సపోర్ట్ చేస్తున్న నాన్న (లయన్ డాక్టర్ సాయివెంకట్)కు థ్యాంక్స్. ఆయన ప్రోత్సాహం లేకుంటే నేను ఈ సినిమా ప్రొడ్యూస్ చేసేదాన్ని కాదు. రాజమౌళి సినిమాలు కూడా రిలీజ్ వాయిదా పడుతుంటాయి. క్వాలిటీ కోసం కొంత టైమ్ తీసుకోవడం మంచిదే. భారీ స్థాయిలో అత్యున్నత సాంకేతిక విలువలతో మా చిత్రాన్ని నిర్మించాం. అన్నివర్గాల ప్రేక్షకులకు నచ్చేలా ఈ చిత్రాన్ని నిర్మించాను” అని చెప్పారు.

సింగర్ పద్మ మాట్లాడుతూ.. “ఈ చిత్రంలో నేను పాట పాడాను. సాయి వెంకట్ ఎంకరేజ్ చేయడంతో సింగర్ కావాలనే నా కల ఈ చిత్రంతో తీరింది” అని తెలిపారు. నిర్మాత, డిస్ట్రిబ్యూటర్ ముత్యాల రాందాస్ మాట్లాడుతూ.. “లయన్ సాయివెంకట్ నాకు మంచి మిత్రులు. ఆయన ‘జయహో రామానుజ’ వంటి గొప్ప సినిమాను రూపొందించడం సంతోషంగా ఉంది. పాన్ ఇండియా భాషల్లో రిలీజ్ చేస్తున్నారంటే ఇది చిన్న సినిమా అనకూడదు. భారీ ఎత్తున రిలీజ్ చేయడంలో మా వంతు సహకారం అందిస్తాం” అన్నారు.