ఆగస్టు 15.. స్వాతంత్య్ర దినోత్సవం.. పౌరులందరూ ఆనందోత్సాహాలతో జరుపుకొనే జాతీయ పండుగ. అంతేనా, సినీ ప్రియులకూ వేడుకే. పీపుల్ మీడియా ఫ్యాక్టరీ బ్యానర్ అభిమానులకు మరీ ప్రత్యేకం. ఎందుకంటే ఆ సంస్థ నిర్మించిన ‘మిస్టర్ బచ్చన్’ ఈ రోజు విడుదలవుతోంది. ఇంకో ఆసక్తికరమైన వార్త ఏమిటంటే ‘మిస్టర్ బచ్చన్’ను చూసేందుకు వెళ్లే రవితేజ ఫ్యాన్స్‌ను ‘రాజాసాబ్’ కూడా పలుకరించనున్నాడు! ఇంకా అర్థం కాలేదా? ప్రభాస్ హీరోగా నటిస్తున్న ‘రాజాసాబ్’ గ్లింప్స్‌ను ‘మిస్టర్ బచ్చన్’ షో ఆడుతున్న థియేటర్లలో ప్రదర్శించనున్నారు. ఈ విషయాన్ని పీపుల్ మీడియా ఫ్యాక్టరీ తన అధికారిక సామాజిక మాధ్యమ ఖాతాల ద్వారా వెల్లడించింది. వాస్తవానికి ‘రాజాసాబ్’ గ్లింప్స్ గత 30వ తేదీనే విడుదల చేసినప్పటికీ అదే వీడియో క్లిప్స్‌ను అభిమానులు బిగ్ స్క్రీన్‌పై చూసిన థ్రిల్ పొందేందుకు ఇలా ప్లాన్ చేశారు.