న్యూఢిల్లి,(విజయక్రాంతి): మాజీ ప్రధాని ఇందిరాగాంధీ జయంతిని పురస్కరించుకుని కాంగ్రెస్‌ జాతీయాధ్యక్షుడు మల్లికార్జున ఖర్గే, కాంగ్రెస్ అగ్రనేత రాహుల్‌ గాంధీ అంజలి ఘటించారు. మంగళవారం ఉదయం ఢిల్లీలోని ఇందిరాగాంధీ శక్తి స్థల్‌ వద్ద వెళ్లిన రాహుల్ గాంధీ, మల్లికార్జున ఖర్గే అక్కడ పుష్పాలు వేసి నివాళులు అర్పించి, సర్వమత ప్రార్థనల్లో పాల్గొన్నారు. ఈ సందర్భంగా రాహుల్ గాంధీ తన నానమ్మతో ఉన్న ఫోటోలను ఎక్స్ వేదికగా పంచుకున్నారు. నానమ్మమ్మ ధైర్యం, ప్రేమ రెండింటికీ ఉదాహరణ అని కొనియాడారు. దేశ ప్రయోజనాల బాటలో నిర్భయంగా నడవడమే అసలైన బలమని తన నానమ్మ నుంచి నేర్చుకున్నట్లు వెల్లడించారు. ఆమెతో ఉన్న జ్ఞాపకాలే తనకు బలం, అవే ఎల్లప్పుడూ తనన్ను ముందుకు నడిపిస్తున్నాయని రాహుల్ గాంధీ పేర్కొన్నారు.