15 రోజుల్లోనే 632.50 కోట్లు వసూల్

టాలీవుడ్ స్టార్ హీరో అల్లు అర్జున్, దర్శకుడు సుకుమార్ కలయికలో రూపొందిన చిత్రం ‘పుష్ప-2 ది రూల్’. మైత్రీ మూవీ మేకర్స్, సుకుమార్ రైటింగ్స్ పతాకాలపై తెరకెక్కిన ఈ చిత్రం డిసెంబర్ 5న ప్రపంచవ్యాప్తంగా విడుదలైన సంగతి తెలిసిందే. నవీన్ ఎర్నేని, వై రవిశంకర్ నిర్మాతలు. ఆరంభం నుంచీ రికార్డులను సృష్టిస్తున్న ఈ సినిమా ప్రపంచ సినీ ప్రేక్షకుల దృష్టిని ఆకర్షిస్తోంది. విడుదలైన తొలిరోజే నుంచే అన్ని ఏరియాల్లో కలెక్షన్ల విషయంలో ఆల్‌టైమ్ రికార్డులు నెలకొల్పుతున్న ఈ చిత్రం బాక్సాఫీస్ వద్ద హవా కొనసాగిస్తోంది.

ముఖ్యంగా వందేళ్ల హిందీ సినీ చరిత్రలో ‘పుష్ప-2’ చిత్రంతో అల్లు అర్జున్ కొత్త రికార్డులు నెలకొల్పుతున్నాడు. ఇప్పటివరకు హిందీ సినీ చరిత్రలో ఏ సినిమా కలెక్ట్ చేయనివిధంగా కేవలం 15 రోజుల్లోనే రూ.632 కోట్ల 50 లక్షల వసూళ్లను సాధించిన తొలి భారతీయ చిత్రంగా ‘పుష్ప-2’ ఘనతను దక్కించుకుంది. ఇప్పటివరకు అత్యధిక వసూళ్లను సాధించిన చిత్రంగా ఉన్న’స్తు2’ లైఫ్ టైమ్ రన్‌ను కేవలం 15 రోజుల్లోనే ‘పుష్ప-2’ అధిగమించడం విశేషం.

అత్యంత వేగంగా 14 రోజుల్లోనే రూ.1500 కోట్లు సాధించిన తొలి భారతీయ చిత్రంగానే కాక, ఒక్క ముంబయిలోనే రూ.200 కోట్లు నెట్‌ను వసూలు చేసిన మొదటి సినిమాగానూ రికార్డు క్రియేట్ చేసింది. ఇదిలా ఉండగా ప్రపంచవ్యాప్తంగా ఇప్పటివరకు మొత్తం రూ.1508 కోట్ల గ్రాస్ కలెక్షన్లు రాబట్టింది. అంతేకాదు 2024 సంవత్సరంలో అత్యధిక గ్రాస్‌ను సాధించిన ఫస్ట్ ఇండియన్ మూవీగానూ రికార్డును నమోదు చేసిందీ సినిమా.

అల్లు అర్జున్ తన కెరీర్‌లో ‘పుష్ప: ది రైజ్’, ‘పుష్ప2: ది రూల్’ చిత్రాలతో 2021, 2024లో బ్యాక్ టు బ్యాక్ హయ్యెస్ట్ గ్రాసర్స్ వసూలు చేసిన ఇండియన్ సినిమాల హీరోగా సరికొత్త రికార్డు సాధించాడు. భవిష్యత్తులో ‘పుష్ప-2’ లాంగ్ రన్‌లో మరిన్ని సరికొత్త రికార్డులు అల్లు అర్జున్ సొంతం చేసుకోబోతున్నాడనేది ఇండియన్ ట్రేడ్ వర్గాల అంచనా.