కోల్‌కతా: వక్ఫ్ (సవరణ) చట్టం( Waqf (Amendment) Act 2025)పై నిరసనల తరువాత హింసాత్మక సంఘటనలతో చెలరేగిన పశ్చిమ బెంగాల్‌లోని ముస్లిం ప్రాబల్య ముర్షిదాబాద్ జిల్లా(Murshidabad District)లో బుధవారం పరిస్థితి ప్రశాంతంగా ఉందని, ఎటువంటి అవాంఛనీయ సంఘటనలు జరిగినట్లు సమాచారం లేదని ఒక సీనియర్ పోలీసు అధికారి తెలిపారు. రఘునాథ్‌గంజ్, సుతి పోలీస్ స్టేషన్ ప్రాంతాలలో నిషేధాజ్ఞలు విధించబడ్డాయి. జిల్లాలోని అన్ని సున్నితమైన ప్రాంతాలలో, ముఖ్యంగా జంగిపూర్ పట్టణంలోని చుట్టుపక్కల పెద్ద సంఖ్యలో ప్రజలు ఈ చట్టాన్ని ఉపసంహరించుకోవాలని డిమాండ్ చేస్తూ మంగళవారం మధ్యాహ్నం గుమిగూడారని ఆయన చెప్పారు.

జంగిపూర్ సబ్ డివిజన్(Jangipur subdivision) పరిధిలోని ప్రాంతాలలో, ఏదైనా తప్పుడు సమాచారం వ్యాప్తి చెందకుండా నిరోధించడానికి ఇంటర్నెట్ కనెక్టివిటీ నిలిపివేయబడింది. పరిస్థితి ప్రశాంతంగా, నియంత్రణలో ఉంది. జిల్లాలో ఎక్కడా ఒక్క అవాంఛనీయ సంఘటన కూడా నివేదించబడలేదు. నిషేధాజ్ఞలు అలాగే ఉన్నాయి. ఏప్రిల్ 10 (గురువారం) సాయంత్రం 6 గంటల వరకు కొనసాగుతాయి. ఇంటర్నెట్ కనెక్టివిటీ సస్పెన్షన్ కూడా ఏప్రిల్ 11 (శుక్రవారం) సాయంత్రం 6 గంటల వరకు కొనసాగుతుంది" అని అధికారి తెలిపారు. మంగళవారం మధ్యాహ్నం జంగిపూర్ ప్రాంతంలోని NH-12 పై వక్ఫ్ బిల్లుకు వ్యతిరేకంగా నిరసన తెలిపేందుకు పెద్ద సంఖ్యలో గుమిగూడిన నిరసనకారులు ఆ ప్రాంతంలో మోహరించిన పోలీసులపై రాళ్ళు రువ్వారు. నిరసన సందర్భంగా పోలీసులకు చెందిన రెండు వాహనాలు తగలబెట్టబడ్డాయని, పరిస్థితిని అదుపులోకి తీసుకురావడానికి పోలీసులు లాఠీచార్జ్ చేసి, టియర్ గ్యాస్ షెల్స్ ప్రయోగించాల్సి వచ్చిందని అధికారి తెలిపారు. రాళ్ల దాడిలో కొంతమంది పోలీసులు గాయపడ్డారని అధికారి తెలిపారు.

ఈ సంఘటనకు సంబంధించి పోలీసులు కొంతమందిని కూడా అదుపులోకి తీసుకున్నారని ఆయన అన్నారు. పశ్చిమ బెంగాల్ గవర్నర్ సి.వి. ఆనంద బోస్(West Bengal Governor C.V. Ananda Bose) ఈ సంఘటనను ఖండించారు. రాష్ట్రంలో శాంతిభద్రతలకు భంగం కలిగించే ప్రయత్నాలను అణచివేయాలన్నారు. హింసను అరికట్టడానికి చర్యలు తీసుకొని నివేదిక సమర్పించాలని బోస్ ప్రభుత్వాన్ని ఆదేశించారు. మైనారిటీలను సంతృప్తిపరిచే పనిలో బిజీగా ఉన్న ముఖ్యమంత్రి మమతా బెనర్జీ(Chief Minister Mamata Banerjee) ఆధ్వర్యంలో రాష్ట్రంలో శాంతిభద్రతల పరిస్థితులు క్షీణిస్తున్నాయని ప్రతిపక్ష బిజెపి ఆరోపించింది. ఒకప్పుడు శ్యామా ప్రసాద్ ముఖర్జీ రక్షణలో ఉన్న పశ్చిమ బెంగాల్ ఇప్పుడు "మమతా బెనర్జీ పాలనలో రక్తస్రావం" అవుతోందని బిజెపి రాష్ట్ర అధ్యక్షుడు సుకాంత మజుందార్(BJP president Sukanta Majumdar) అన్నారు. వక్ఫ్ (సవరణ) బిల్లును గురువారం లోక్‌సభ ఆమోదించింది. పార్లమెంటు ఉభయ సభలలో మారథాన్ చర్చల తర్వాత శుక్రవారం తెల్లవారుజామున రాజ్యసభ ఆమోదించింది. వారసత్వ ప్రదేశాలను కాపాడటానికి, సామాజిక సంక్షేమాన్ని ప్రోత్సహించడానికి నిబంధనలతో వక్ఫ్ ఆస్తుల (ముస్లింలు మతపరమైన లేదా దాతృత్వ ప్రయోజనాల కోసం శాశ్వతంగా విరాళంగా ఇచ్చే ఆస్తులు) నిర్వహణను క్రమబద్ధీకరించడం ఈ చట్టం లక్ష్యం. రాష్ట్రపతి ద్రౌపది ముర్ము శనివారం బిల్లుకు తన ఆమోదం తెలిపారు.