మేడ్చల్,(విజయక్రాంతి): కీసర మండలం కుందన్ పల్లి వద్ద మంగళవారం ఉదయం ఘోర రోడ్డు ప్రమాదం జరిగింది. స్థానికులు తెలిపిన వివరాల ప్రకారం.. ఓ ప్రైవేట్ పాఠశాల బస్సు అదుపుతప్పి విద్యుత్ స్తంభాన్ని ఢీకొన్నది. ఈ ప్రమాదంలో పలువురు విద్యార్థులకు గాయాలయ్యాయి.ప్రమాదాన్ని గమనించిన స్థానికులు, రోడ్డు ప్రయాణికులు విద్యార్థులను రక్షించారు. గాయపడిన విద్యార్థులను ఆసుపత్రికి తరలించి ప్రథమ చికిత్స అందించారు.

ఈ ప్రమాదం సమయంలో బస్సులో మొత్తం 40 మంది విద్యార్థులు ఉన్నారు. స్థానికుల సమాచారంతో పోలీసులు ఘటన స్థలానికి చేరుకున్న వివరాలను అడిగి తెలుసుకొని, సహాయక చర్యలు చేపట్టారు. అనంతరం స్కూల్ బస్సును పోలీస్ స్టేషన్ కు తరలించి డ్రైవర్ ను అదుపులోకి తీసుకున్నారు. ఈ మేరకు కేసు నమోదు చేసుకొని దర్యాప్తు చేస్తున్నట్లు పోలీసులు పేర్కొన్నారు.