వచ్చే ఏడాది వృద్ధి రేటు 6.3---6.8 శాతం

స్థిరంగా ప్రైవేటురంగ వినియోగం

2024-25 నాలుగో త్రైమాసికంలో ఆహార ద్రవ్యోల్బణం తగ్గొచ్చు

బలంగా వ్యవసాయ రంగం.. పురోగమిస్తున్న పారిశ్రామిక రంగం 

ప్రభుత్వ మూలధనం పెరగడం, వ్యాపార అంచనాలు 

మెరుగుపడటంతో పుంజుకోనున్న పెట్టుబడులు

మూలధన వ్యయం 38.8 శాతం పెరుగుదల

న్యూఢిల్లీ, జనవరి 31 (విజయక్రాంతి) : వచ్చే ఏడాది ధరల నియంత్రణ దిశగా దేశ ఆర్థిక పరిస్థితులు ఉంటాయని ఆర్థిక సర్వే అంచనా వేసింది.  అంతర్జాతీయంగా అనిశ్చితులు ఉన్నప్పటికీ 2025-- 26 ఆర్థిక సంవత్సరానికి గాను దేశ జీడీపీ 6.3--6.8 శాతంగా ఉండొచ్చని ఆర్థిక సర్వే అంచనా వేసింది.

దేశ ఆర్థిక మూలాలు బలంగా ఉండడం, నిరుద్యోగిత రేటు తగ్గడం, ద్రవ్యోల్బణం నిలకడగా ఉండడం  వృద్ధి రేటు ఈ స్థాయిలో ఉండడానికి కారణాలుగా సర్వే పేర్కొం ది. అయితే వృద్ధి రేటు మరింత ఊపందుకోవడానికి మరిన్ని ఆర్థిక సంస్కరణలు అవసరమని సర్వే అభిప్రాయపడింది. కాగా 2024- 25ఆర్థిక సంవత్సరంలో వృద్ధి రేటు 6.4 శాతంగా ఉంటుందని అంచనా వేసింది.

ఈ వృద్ధి రేటు దశాబ్దపు సగటుకు దగ్గర్లో ఉన్నప్పటికీ గత మూడేళ్ల్లతో పోలిస్తే తక్కువే. కొవిడ్ సంవత్సరం 2020- 21లో మాత్రమే జీడీపీ 5.8 శాతం నెగెటివ్ వృద్ధిని నమోదు చేసింది. అయితే ఆ తర్వాతి సంవత్సరం 2021- 22లో జీడీపీ 9.7 శాతం వృద్ధిని నమోదు చేసింది. 2022- 23లో 7 శాతం, గత ఆర్థిక సంవత్సరంలో 8.2 శాతం వృద్ధి నమోదైంది.

బడ్జెట్ సమావేశాల్లో భాగంగా 2024-- 25 ఆర్థిక సర్వే ను కేంద్ర ఆర్థికశాఖ మంత్రి నిర్మలా సీతారామన్ శుక్రవారం లోక్‌సభలో ప్రవేశపెట్టారు. పార్లమెంట్ ఉభయ సభలనుద్దేశించి రాష్ట్రపతి ద్రౌపదీ ముర్ము ప్రసంగం పూర్తయిన తర్వాత ఆమె ఆర్థిక సర్వేను సభ ముందు ఉంచారు. 2025 ఆర్థిక సంవత్సరం జులై-  సెప్టెంబర్ త్రైమాసికంలో  రియల్ టర్మ్‌లో భారత వృద్ధి రేటు 5.4 శాతంగా నమోదైందని, ఇది ఆర్‌బీఐ అంచనా వేసిన 7 శాతంకన్నా తక్కువని తెలిపింది.

అలాగే ఏప్రిల్-  జూన్ త్రైమాసి కంలో కూడా జీడీపీ వృద్ధి రేటు ఆర్‌బీఐ అంచనాలను అందుకోలేదని సర్వే తెలిపింది. అయితే ప్రస్తుత ఆర్థిక సంవత్సరం చివరి త్రైమాసికంలో ఆహార ద్రవ్యోల్బణం తగ్గొచ్చని తెలిపింది.కూరగాయల ధలు తగ్గడం, ఖరీఫ్ పంట రావడం దీనికి కారణమని పేర్కొంది.

దీని ప్రభావంతో 2026 తొలి ప్రథమార్థంలో కూడా ఆహార ధరలు అదుపులోనే ఉంటాయని తెలిపింది. అయితే  వాతావరణ పరిస్థితులు, అంతర్జాతీయ వ్యవసాయ ధరలు ద్రవ్యోల్బణంపై ప్రభావం చూపించే అవకాశాలున్నాయని తెలిపింది. 2024- 225 జాతీయ ఆదా యం డాటా దేశంలోని అన్ని రంగాలు పటిష్ఠంగా ఉన్నాయని తెలిపింది.

వ్యవసాయ రంగం యథాప్రకారం బలంగా ఉందని, అన్ని ట్రెండ్ లెవెల్స్‌ను అధిగమించిందని పేర్కొంది. పారిశ్రామిక రంగం కూడా కొవిడ్ మహమ్మారికి ముందున్న పరిస్థితిని అధిగమించి పురోగమిస్తోందని, సేవా రంగం పుంజుకుందని సర్వే స్పష్టం చేసింది.

కేంద్ర బడ్జెట్ సమర్పణకు ముందు ఆర్థిక సర్వేను ప్రవేశపెట్టడం ఆనవాయితీగా వస్తోంది. గత సంవత్సర కాలంలో దేశ ఆర్థిక పనితీరును, రాబోయే సంవత్సరంలో ఆర్థికంగా ఎదురయ్యే సవాళ్లను ముందుగానే అంచనా వేసి చెప్పేదే ఈ ఎకనామిక్ సర్వే. ఆర్థిక మంత్రిత్వశాఖకు చెందిన ఎకనామిక్ అఫైర్స్ డిపార్ట్‌మెంట్‌లోని ఎకనామిక్ డివిజన్ ఈ సర్వేను రూపొందిస్తుంది. తొలుత 1950- --51 సంవత్సరం నుంచి ఆర్థిక సర్వేను బడ్జెట్‌తో పాటే ప్రవేశపెట్టేవారు. 1960 తర్వాత బడ్జెట్‌కు ఒకరోజు ముందు ప్రవేశపెట్టే సంప్రదాయం మొదలైంది.

ఆర్థిక సర్వే  ముఖ్యాంశాలు

* ప్రైవేటు రంగ వినియోగం స్థిరంగా ఉంది.

* వచ్చే ఏడాది ఆర్థిక పరిస్థితులు మందకొడిగా ఉంటాయని అంచనా. రబీ పంట దిగుబడి బాగుంటే.. 2026 తొలి అర్ధభాగంలో ఆహార పదార్థాల ధరలు తగ్గే అవకాశం ఉంది.

* ఖరీఫ్ పంట రావడంతో ఆహార పదార్థాల ధరలు తగ్గాయి. దీంతో 2024- -25 నాలుగో త్రైమాసికంలో ఆహార ద్రవ్యోల్బణం తగ్గొచ్చు.

* 2025- 26 ఆర్థికసంవత్సరంలో ద్రవ్యోల్బణ భయాలు కాస్త తగ్గుముఖం పట్టొచ్చు. అయితే, భౌగోళిక రాజకీయ అనిశ్చితుల రూపంలో ఇంకా ముప్పు పొంచే ఉంది.

* ప్రభుత్వ మూలధనం పెరగడం, వ్యా పార అంచనాలు మెరుగుపడటంతో పె ట్టుబడులు పుంజుకుంటాయని అంచనా

* దేశీయంగా నెలకొన్న వాతావరణ పరిస్థితులు, అంతర్జాతీయంగా బలహీన డిమాండ్ నేపథ్యంలో గతేడాది తయారీ రంగం ఒత్తిడికి గురైంది.

* తయారీ రంగం నెమ్మదించడం, కార్పొరేట్ పెట్టుబడులు తగ్గడంతో 2024- -25లో భారత వృద్ధి రేటు 6.4శాతానికి పరిమితం కావొచ్చు. గత నాలుగేళ్లలో ఇదే అత్యల్పం. 2023-- 24లో వృద్ధి రేటు 8.2శాతంగా ఉండగా.. 2022-- 23లో 7.2శాతం, 2021-22లో 8.7శాతంగా ఉంది.

* గత ఆర్థిక సంవత్సరంలో దేశంలో ఐపీఓ లిస్టింగ్‌లు గణనీయంగా నమోదయ్యాయి. ప్రపంచవ్యాప్తంగా ఐపీఓ లిస్టింగ్‌లో మన వాటా 30శాతంగా ఉంది. 2023తో పోలిస్తే ఇది 17శాతం ఎక్కువ.

* గత ఐదేళ్లలో మౌలిక సదుపాయాల కల్పనపై ప్రభుత్వం ప్రత్యేక దృష్టి సారించింది. దీని వల్ల భారీ మౌలికవసతుల రంగాల్లో కేంద్ర మూలధన వ్యయం 2020 ఆర్థిక సంవత్సరంతో పోలిస్తే 38.8శాతం పెరిగింది.

* 2024-- 25 ఆర్థిక సంవత్సరంలో 5853 కిలోమీటర్ల జాతీయ రహదారులను నిర్మాణం పూర్తి.

* జల్‌జీవన్ మిషన్ కింద ఇప్పటివరకు 12 కోట్లకు పైగా కుటుంబాలకు కొళాయిల ద్వారా తాగు నీరు సదుపాయం.

పని గంటలు పెరిగితే ఆరోగ్య సమస్యలు

న్యూఢిల్లీ: ఉద్యోగుల పని గంటల పెంపు అంశంపై దేశ వ్యాప్తంగా చర్చ జరుగుతున్న నేపథ్యం లో ఆర్థిక సర్వే  కీలక వివరాలు వెల్లడించింది. వారానికి 60 అంతకంటే ఎక్కువ గంటలు పని చేయడం వల్ల ఆరోగ్య సమస్యలు తలెత్తే అవకాశముందని తెలిపింది. ఆఫీసులో రోజుకు 12 గంట లు లేదా అంతకంటే ఎక్కువ సమయం గడుపుతున్న ఉద్యోగుల్లో మానసిక రుగ్మతలు ఏర్పడే అవకాశమున్నట్లు ఆర్థిక సర్వే పేర్కొంది.

సాధారణంగా ఉత్పాదకతకు పని గంటలనే కొలమానంగా పరిగణిస్తుంటారు. అంటే ఎంత ఎక్కువ సమయం పని చేస్తే.. రిజల్ట్ అంత ఎక్కువగా వస్తుందని భావిస్తుంటారు. అయితే, డబ్ల్యూహెచ్‌ఓ, ఐఎల్‌ఓ సంస్థల అధ్యయనాల ప్రకారం.. వారానికి 55 నుంచి 60 పని గంటలు దాటితే సదరు ఉద్యోగి ఆరోగ్యంపై ప్రతికూల ప్రభావం పడుతుంది. మానసికంగా కుంగిపోయే అవకాశముంది.

ఈ సంద ర్భంగా మానవుడి మెదడు, మనసుపై సపియన్ ల్యాబ్స్ సంస్థ చేసిన పరిశోధనను ఆర్థిక సర్వే ఉటంకించింది. ఎవరైతే కార్యాలయాల్లో రోజుకు 12 గంటలు లేదా అంతకంటే ఎక్కువ సమయం పని చేస్తారో వారి మానసిక స్థితి, సాధారణ సమయం పని చేసేవారి కన్నా 100 పాయింట్లు తక్కువగా ఉంటుందట.

మరోవైపు ఆఫీసు వాతా వరణం, సహోద్యోగులతో సత్సంబంధాలు కూడా ఉత్పాదకతను ప్రభావితం చేస్తాయని ఆర్థిక సర్వే తెలిపింది. నెలకు కనీసం రెండు, మూడు రోజులు కుటుంబ సభ్యులు, బంధువులతో గడపడం వల్ల ఉద్యోగుల్లో ఒత్తిడి, మానసిక సమస్యలు తొలగి.. మెరుగైన జీవనశైలి సాధ్యపడుతుందని ఆర్థిక సర్వే పేర్కొంది.