“కల్కి 2898 AD” విడుదలకు కౌంట్‌డౌన్‌ ప్రారంభం కావడంతో టాలీవుడ్‌లో ఉత్కంఠ నెలకొంది. కల్కి 27 జూన్ 2024న థియేటర్లలోకి రానుంది. ఈ భారీ అంచనాలతో వస్తున్న ఈ చిత్రం బాక్సాఫీస్ రికార్డులను బద్దలు కొట్టడానికి సిద్ధంగా ఉంది. ఇప్పటికే ఈ చిత్రం విడుదలైన ట్రైలర్, టీజర్ లు రికార్డులు సృష్టించిన విషయం తెలిసిందే. ఈ నేపథ్యంలో కల్కి చూడాలనుకున్న సినీ ప్రియులకు షాక్ తగిలింది. ప్రభాస్ నటించిన 'కల్కి 2898 ఎడి' చిత్ర టికెట్ ధరల పెంచుతూ, అదనపు షోలకు తెలంగాణ ప్రభుత్వం అనుమతిచ్చింది.

ఈ నెల 27 నుంచి జులై 4 వరకు 8 రోజులపాటు టికెట్ ధరల పెంపునకు అనుమతిస్తూ ప్రభుత్వం ఉత్తర్వులు జారీ చేసింది. టికెట్ ధరల పెంపు, అదనపు షోలకు అనుమతి కోరుతూ వైజయంతీ మూవీస్ దరఖాస్తు చేసుకుంది. కల్కి చిత్ర టికెట్ పై గరిష్టంగా రూ.200,సాధారణ థియేటర్లలో రూ.70, మల్టీఫ్లెక్స్ ల్లో రూ.100పెంచుకునేందుకు అనుమతిచ్చింది. సినిమా ప్రారంభ రోజైన జూన్ 27న ఉదయం 5:30 గంటలకు ప్రత్యేక 6వ షోను మేకర్స్ ప్రదర్శించనున్నారు. ఇప్పటికే ఈ సినిమా కోసం సినీ ప్రియులు, ప్రభాస్ ఫ్యాన్స్ ఎంతగానో ఎదురుచూస్తున్నారు.