‘సలార్’, ‘కల్కి 2898ఏడీ’ లాంటి వరుస బ్లాక్‌బస్టర్లతో ప్రేక్షకులను అలరిస్తున్నాడు ప్రభాస్. ఆయన సైన్ చేసిన ప్రాజెక్టులు కూడా చాలానే ఉన్నాయి. అయితే ఆయన నెక్స్ ప్రాజెక్టుల్లో ఒక దానికి ఎట్టకేలకు కొబ్బరి కాయ కొట్టేశారు. డైరెక్టర్ హను రాఘవపూడి దర్శకత్వం వహిస్తున్న సినిమాను శనివారం నిర్వహించిన పూజతో లాంఛనంగా ప్రారంభించారు. హీరో, హీరోయిన్‌తో పాటు పలువురు మూవీ యూనిట్ సభ్యులు ఈ కార్యక్రమానికి హాజరయ్యారు. మైత్రీ మూవీ మేకర్స్ సంస్థ దీన్ని నిర్మిస్తోంది. ప్రభాస్, హను రాఘవపూడి, మైత్రీ మూవీ మేకర్స్ కలయిలో వస్తున్న మొదటి చిత్రం ఇదే కావటంతో ఈ కాంబినేషన్‌పై భారీ అంచనాలు నెలకొన్నాయి.

డైరెక్టర్ హను ఈ సినిమా కోసం1940 బ్యాక్ డ్రాప్‌లో హిస్టారికల్ స్క్రిప్ట్‌ని సిద్ధం చేశారు. ఈ చిత్రంలో ప్రభాస్ సరసన ఇమాన్వి హీరోయిన్‌గా నటిస్తుండగా, ప్రముఖ స్టార్ యాక్టర్స్ మిథున్ చక్రవర్తి, జయప్రద కీలక పాత్రలు పోషిస్తున్నారు. నిర్మాతలు నవీన్ యెర్నేని, వై.రవిశంకర్ నిర్మిస్తున్న ఈ చిత్రానికి సుదీప్ ఛటర్జీ ఐఎస్‌సీ డీవోపీ కాగా, విశాల్ చంద్రశేఖర్ సంగీతం అందిస్తున్నారు. రామకష్ణ మోనికా ప్రొడక్షన్ డిజైన్ బాధ్యత తీసుకోగా, కోటగిరి వెంకటేశ్వరరావు ఎడిటర్‌గా వ్యవహరిస్తున్నారు. త్వరలోనే ఈ సినిమా సెట్స్‌పైకి వెళ్లనుంది.