హైదరాబాద్: తెలంగాణలో లోక్ సభ ఎన్నికలకు పోలింగ్ కొనసాగుతోంది. మావోయిస్ట్ ప్రభావిత ప్రాంతాల్లో సాయంత్రం 4 గంటలకే పోలింగ్ ముగిసింది. 5 లోక్ సభ నియోజకవర్గాల పరిధిలోని 13 అసెంబ్లీ సెగ్మెంట్‌లలో ఓటింగ్ ప్రక్రియను అధికారులు ముగించారు. 106 అసెంబ్లీ సెగ్మెంట్ల పరిధిలో సాయంత్రం 6 వరకు పోలింగ్ కొనసాగనుంది. సిర్పూర్, అసిఫాబాద్, చెన్నూరు, బెల్లంపల్లి, మంచిర్యాల, మంథని, భూపాలపల్లి, ములుగు, పినపాక, ఇల్లందు, భద్రాచలం, కొత్తగూడెం, అశ్వారావుపేట తదితర సెగ్మెంట్లలో పోలింగ్ ముగిసింది. సాయంత్రం నాలుగు గంటల లోపు క్యూలైన్లో వేచి ఉన్న వారికి ఓటు వేసేందుకు అవకాశం కల్పిస్తారు. ఎన్నికల నిబంధనలు అమల్లోకి వచ్చినప్పటి నుంచి పోలింగ్ రోజు వరకు తెలంగాణలో రూ.192 కోట్లను సీజ్ చేసినట్లు డీజీపీ రవి గుప్తా వెల్లడించారు.