న్యూఢిల్లీ: బంగ్లాదేశ్ తాత్కాలిక ప్రభుత్వాధినేత ముహమ్మద్ యూనస్‌( Muhammad Yunus)కు ప్రధానమంత్రి నరేంద్రమోదీ(Narendra Modi) ఒక లేఖ రాశారు. బంగ్లాదేశ్ స్వాతంత్య్ర దినోత్సవం సందర్భంగా ప్రధాని మోదీ శుభాకాంక్షలు తెలిపారు. ఇరుదేశాల దైపాక్షిక భాగస్వామ్యానికి పునాది పడిన రోజుగా మోదీ అభివర్ణించారు. విముక్తి యుద్ధాన్ని 'భాగస్వామ్య చరిత్ర'గా పేర్కొంటూ పరస్పర సున్నితత్వం ప్రాముఖ్యతను ఎత్తిచూపారు. రెండు దేశాల మధ్య భాగస్వామ్యాన్ని ముందుకు తీసుకెళ్లడానికి భారతదేశంనిబద్ధతను పునరుద్ఘాటించారు. "శాంతి, స్థిరత్వం, శ్రేయస్సు కోసం మా ఉమ్మడి ఆకాంక్షల ద్వారా ఒకరి ప్రయోజనాలు, ఆందోళనలకు పరస్పర సున్నితత్వం ఆధారంగా ఈ భాగస్వామ్యాన్ని ముందుకు తీసుకెళ్లడానికి మేము కట్టుబడి ఉన్నాము." అని ప్రధాన మంత్రి పేర్కొన్నారు.

రాష్ట్రపతి ద్రౌపది ముర్ము(President Draupadi Murmu) కూడా ముహమ్మద్ యూనస్‌ కు శుభాకాంక్షలు తెలిపారు. ప్రజాస్వామ్య, ప్రగతిశీల బంగ్లాదేశ్‌కు భారతదేశం మద్దతు ఇస్తుందని ఆమె పునరుద్ఘాటించారు. "ప్రభుత్వం తరపున, భారత ప్రజల తరపున, నా తరపున, మీ జాతీయ దినోత్సవం సందర్భంగా మీ గౌరవనీయులకు, స్నేహపూర్వక బంగ్లాదేశ్ ప్రజలకు హృదయపూర్వక శుభాకాంక్షలు, అభినందనలు తెలియజేస్తున్నాను" అని రాష్ట్రపతి ముర్ము పేర్కొన్నారు. షేక్ హసీనా నేతృత్వంలోని అవామీ లీగ్ ప్రభుత్వం కూలిపోయిన తర్వాత, ఆమె భారతదేశానికి పారిపోవాల్సి వచ్చిన తర్వాత రెండు దేశాల మధ్య సంబంధాలు ఉద్రిక్తంగా ఉన్నాయి. ప్రస్తుతం అధ్యక్షుడి మార్పు తర్వాత ఏర్పడిన తాత్కాలిక ప్రభుత్వానికి నోబెల్ గ్రహీత, ఆర్థికవేత్త ముహమ్మద్ యూనస్ నాయకత్వం వహిస్తున్నారు.

అప్పటి నుండి, మైనారిటీలపై, ముఖ్యంగా హిందువులపై దాడులు జరుగుతున్నాయి. దీనిపై భారతదేశం బంగ్లాదేశ్‌తో తన ఆందోళనలను పంచుకుంది. కేంద్ర ప్రభుత్వం వివిధ స్థాయిలలో తాత్కాలిక ప్రభుత్వంతో సంప్రదింపులు జరుపుతోందని, అలాంటి అంశాలను లేవనెత్తుతూనే ఉంటుందని విదేశాంగ మంత్రి డాక్టర్ ఎస్. జైశంకర్ అన్నారు. నివేదికల ప్రకారం, బంగ్లాదేశ్ స్వాతంత్య్ర దినోత్సవం సందర్భంగా ముహమ్మద్ యూనస్ 1971 త్యాగాలను గుర్తుచేసుకున్నారు. దేశం ఎదుర్కొంటున్న ప్రస్తుత సవాళ్లను ప్రస్తావించారు. విముక్తి యుద్ధంలో అమరవీరులకు జూలై 2024 ఆందోళన బాధితులకు ఆయన నివాళులర్పించారు. 1971 మార్చి 25 రాత్రి పాకిస్తాన్ సైన్యం(Pakistan Army) చేసిన దురాగతాలను యూనస్ ఖండించారు. చరిత్రను గుర్తుంచుకోవడం ప్రాముఖ్యతను పునరుద్ఘాటించారు. తన ప్రసంగంలో, బంగ్లాదేశ్, భారతదేశం, నేపాల్, భూటాన్లతో కూడిన ఉమ్మడి ఆర్థిక వ్యవస్థ సామర్థ్యాన్ని ఆయన నొక్కి చెప్పారు.