అమరావతి: ఆంధ్రప్రదేశ్‌లో రెండు గ్రాడ్యుయేట్ ఎమ్మెల్సీ నియోజకవర్గాలు, ఒక టీచర్స్ ఎమ్మెల్సీ నియోజకవర్గానికి గురువారం ఎన్నికలు జరిగాయి. గుంటూరు-కృష్ణా, జంట గోదావరి జిల్లాల్లోని గ్రాడ్యుయేట్స్ ఎమ్మెల్సీ(Graduates MLC Elections) స్థానాలకు, అలాగే ఉత్తరాంధ్ర ప్రాంతంలోని టీచర్స్ ఎమ్మెల్సీ స్థానానికి పోలింగ్ జరిగింది. ఆంధ్రప్రదేశ్ ముఖ్యమంత్రి చంద్రబాబు నాయుడు(Chief Minister Chandrababu Naidu), మంత్రి నారా లోకేష్ ఉండవల్లిలోని పోలింగ్ బూత్‌లో తమ ఓటు హక్కును వినియోగించుకున్నారు. 

అయితే, ఆంధ్రప్రదేశ్ ఉప ముఖ్యమంత్రి పవన్ కళ్యాణ్(Deputy Chief Minister Pawan Kalyan) ఈ ఎన్నికల్లో ఓటు వేయలేకపోయారు. నిబంధనల ప్రకారం, గ్రాడ్యుయేట్స్ ఎమ్మెల్సీ ఎన్నికల్లో గ్రాడ్యుయేట్లు మాత్రమే ఓటు వేయడానికి అర్హులు. పవన్ కళ్యాణ్ గ్రాడ్యుయేట్ కానందున, అతను ఓటు వేయడానికి అర్హత ప్రమాణాలను కలిగి లేడు. అటు పవన్ కళ్యాణ్ ఎన్నికల్లో కూటమి అభ్యర్థులకు మద్దతు ఇవ్వాలని ఓటర్లను కోరుతూ ఒక వీడియోను విడుదల చేశారు. తెలంగాణ, ఆంధ్రప్రదేశ్‌లోని గ్రాడ్యుయేట్, టీచర్ల ఎమ్మెల్సీ స్థానాలకు పోలింగ్ ముగిసింది. ఉదయం 8 గంటలకు ప్రారంభమైన ఓటింగ్‌ సాయంత్రం 4 గంటలకు ముగిసింది. మార్చి 3న ఓట్ల లెక్కింపు జరగనుంది.