రామ్ చరణ్ హీరోగా స్టార్ డైరెక్టర్ శంకర్ దర్శకత్వంలో రూపొందిన భారీ బడ్జెట్ చిత్రం ‘గేమ్ చేంజర్’. ఈ చిత్రంలో రామ్ చరణ్ సరసన కియారా అద్వాణీ, అంజలి హీరోయిన్లుగా నటించారు. ఈ సినిమాను అనిత సమర్పణలో శ్రీవెంకటేశ్వర క్రియేషన్స్, జీ స్టూడియోస్, దిల్ రాజు ప్రొడక్షన్ బ్యానర్స్‌పై దిల్ రాజు, శిరీష్ నిర్మించారు. ఈ సినిమా జనవరి 10న ప్రేక్షకుల ముందుకు రానుంది. ఈ క్రమంలోనే చిత్ర ప్రమోషన్స్‌లో భాగంగా అంజలి మీడియాతో ముచ్చటించారు. 

మీరు నటించిన రెండు చిత్రాలు సంక్రాంతికి వస్తున్నాయి.. ఎలా ఉంది? 

ఏ యాక్టర్‌కైనా సంక్రాంతికి సినిమా వస్తుందంటే ఆనందంగా ఉంటుంది. తెలుగులో గేమ్ చేంజర్, తమిళంలో విశాల్ చిత్రం రాబోతోంది. ఈ రెండు చిత్రాలకు మంచి రెస్పాన్స్ వస్తుందని ఆశిస్తున్నా.

‘గేమ్ చేంజర్’లో మీ కారెక్టర్ గురించి.. 

గేమ్ చేంజర్‌లో నా పాత్ర పేరు పార్వతి. మా అమ్మ పేరు కూడా పార్వతి. శంకర్ గారు కథ చెప్పినప్పుడు.. కారెక్టర్ పేరు చెప్పినప్పుడు మా అమ్మే గుర్తుకు వచ్చారు. శంకర్ గారు నా పర్ఫామెన్స్‌ను చూసి చాలా చోట్ల మెచ్చుకున్నారు. ఇది నా కెరీర్‌లో ది బెస్ట్ చిత్రం, కారెక్టర్ అవుతుంది. 

ఈ పాత్ర కోసం మీ ప్రిపరేషన్స్ ఏంటి?

పార్వతి పాత్ర కోసం నేనేమీ ప్రత్యేకంగా ప్రిపేర్ అవ్వలేదు. నా పాత్రలో సస్పెన్స్, ట్విస్ట్ ఉంటుందని శంకర్ గారు ఆల్రెడీ చెప్పారు. కాబట్టి ఇంకా నేను ఆ కారెక్టర్ గురించి ఎక్కువగా చెప్పకూడదు. 

మీకు నేషనల్ అవార్డు వస్తుందటా?!

నేను కూడా కథ విన్నప్పుడు అలానే అనుకున్నా. నాక్కూడా అలానే అనిపించింది. అంతా అంటున్నట్టుగా అదే నిజమైతే అంతకంటే గొప్ప విషయం, సక్సెస్ ఇంకేం ఉంటుంది. 

అప్పన్న పాత్రతో మీ జర్నీ ఎలా ఉండబోతోంది?

నా పాత్రలో చాలా సోల్ ఉంటుంది. ఎక్కువగా రివీల్ చేయొద్దనే ట్రైలర్, టీజర్‌లో తక్కువ షాట్స్ పెట్టారు. అప్పన్న, పార్వతీల ప్రేమ, వారి బంధం చాలా గొప్పగా ఉంటుంది.. ఈ సినిమాకు అదే ప్లస్ అవుతుంది.

రామ్ చరణ్‌తో వర్క్ ఎలా అనిపించింది?

రామ్‌చరణ్ తన కో స్టార్స్‌కు కంఫర్ట్ ఇస్తారు. ఆన్ స్క్రీన్, ఆఫ్ స్క్రీన్ చాలా కామ్‌గా ఉంటా రు. సెట్స్‌లో అందరితోనూ బాగా ఉంటారు. అందరితోనూ చక్కగా మాట్లాడతారు. 

ఆయనతో మీరు చేసిన సాంగ్ గురించి..

ప్రీ రిలీజ్ ఈవెంట్‌లో అరుగు మీద’ అంటూ ఓ పాటను రిలీజ్ చేశాం. ఇప్పటికే ఈ పాట రీల్స్‌లో ట్రెండ్ అవుతోంది. అది ఎప్పటికీ నిలిచిపోయే పాట. 

‘గేమ్ చేంజర్’ మీ లైఫ్‌కు గేమ్ చేంజర్ అవుతుందా?

చిరంజీవి గారు సినిమా చూసి నా పాత్రను మెచ్చుకున్నారని తెలిసింది. అదే నాకు పెద్ద అవార్డులా అనిపిస్తోంది.