షూటింగ్ ఒలింపిక్ ట్రయల్స్ 

భోపాల్:  తెలంగాణ షూటర్ ఇషా సింగ్ ఒలింపిక్ షూటింగ్ ట్రయల్స్‌లో సత్తా చాటింది. ట్రయల్స్‌లో రెండో విజయాన్ని సాధించిన ఇషా పారిస్ బెర్త్‌కు మరింత దగ్గరైంది. ఆదివారం జరిగిన మహిళల 25 మీటర్ల పిస్టల్ విభాగంలో ఇషా సింగ్ 43 పాయింట్లు సాధించి అగ్రస్థానంలో నిలిచింది. మనూ బాకర్ 40 పాయింట్లతో రెండో స్థానంలో, రిథమ్ సంగ్వాన్ 33 పాయింట్లు స్కోర్ చేసి మూడో స్థానం దక్కించుకున్నారు. ఇక పురుషుల పిస్టల్ 25 మీటర్ల ర్యాపిడ్ ఫైర్ విభాగం ఫైనల్లో అనీశ్ 36 పాయింట్లతో అగ్రస్థానం సంపాదించాడు. విజయ్ వీర్ (31 పాయింట్లు), అంకుర్ గోయల్ (19 పాయింట్లు) వరుసగా ద్వితీయ, తృతీయ స్థానాలు దక్కించుకున్నారు. మహిళల, పురుషుల విభాగాల్లో సోమవారం నాలుగో ట్రయల్స్ జరగనున్నాయి. మొదటి మూడు ట్రయల్స్ ముగిసేసరికి మహిళల విభాగంలో మనూ బాకర్ మొదటి స్థానంలో, ఇషా సింగ్ రెండో స్థానంలో ఉన్నారు.