బ్రిస్బేన్: ఆసీస్ మీద వన్డే సిరీస్‌ను కైవసం చేసుకుని మంచి ఊపులో కనిపించిన పాకిస్తాన్ గురువారం జరిగిన తొలి టీ20లో మాత్రం 29 పరుగుల తేడాతో ఓటమి చవిచూసింది. వర్షం అంతరాయంతో 7 ఓవర్లకు కుదించిన మ్యాచ్‌లో ఆసీస్ తొలుత బ్యాటింగ్ చేసి 4 వికెట్ల నష్టానికి 93 పరుగులు చేసింది.

హార్డ్ హిట్టర్ గ్లెన్ మ్యాక్స్‌వెల్ (43; 19 బంతుల్లో) బౌలర్లను ఊచకోత కోసి జట్టుకు భారీ స్కోర్ అందించాడు. అనంతరం 94 పరుగుల టార్గెట్‌తో బరిలోకి దిగిన పాక్ నిర్ణీత 7 ఓవర్లలో 9 వికెట్ల నష్టానికి 64 పరుగులు మాత్రమే చేయగలిగింది. అబ్బాస్ అఫ్రిది (20) టాప్ స్కోరర్. ఆసీస్ బౌలర్లలో బార్ట్‌లెట్, నాథన్ ఎల్లిస్ చెరో మూడు వికెట్లతో సత్తా చాటారు. ఇరుజట్ల మధ్య రెండో టీ20 శనివారం జరగనుంది.