హైదరాబాద్, సెప్టెంబర్ 28 (విజయక్రాంతి): తెలంగాణ జాతి గర్వించదగిన అద్భుత కళాకారుడు, దర్శకుడు, నటుడు, నిర్మాత పైడి జయ్‌రాజ్ అని ముఖ్యమంత్రి రేవంత్‌రెడ్డి అన్నారు. కరీంనగర్ నుంచి మొదలై హైదరాబాద్ వ్యాయామశాలలో శిక్షణ పొంది, జాతీయ చలనచిత్ర సీమను ఏలిన గొప్ప నటుడు అని కొనియాడారు. జయ్‌రాజ్ 115వ జయంతి సందర్భంగా ప్రముఖ జర్నలిస్టు, నంది పురస్కార గ్రహీత పొన్నం రవిచంద్ర..

జయ్‌రాజ్ జీవితంపై రాసిన ‘ద ఫస్ట్ యాక్షన్ హీరో’ పుస్తకాన్ని సచివాయలంలో సీఎం శనివారం ఆవిష్కరించారు. సినీరంగంలో ఎదుగాలనుకునే తెలంగాణ యువ దర్శకులు, నటులు.. పైడి జయ్‌రాజ్ స్ఫూర్తితో ముందుకెళ్లాలని రేవంత్‌రెడ్డి సూచించారు. ఈ కార్యక్రమంలో బీసీ సంక్షేమశాఖ మంత్రి పొన్నం ప్రభాకర్, భాషా సాంస్కృతిక శాఖ సంచాలకుడు డాక్టర్ మామిడి హరికృష్ణ, తిరుపతి తదితరులు పాల్గొన్నారు.