* ఒప్పంద ప్రతిపాదనపై ఉన్నతస్థాయి బృందం చర్చలు

హైదరాబాద్ సిటీ బ్యూరో, జనవరి 30:  రాష్ర్టంలోని ప్రతిష్ఠాత్మక విద్యాసంస్థలు ఉస్మానియా విశ్వవిద్యాలయం(ఓయూ), ఇంగ్లిష్ అండ్ ఫారిన్ లాంగ్వేజెస్ యూనివర్సిటీ(ఇఫ్లూ)  మధ్య గురువారం కీలక సంప్రదింపులు జరిగాయి. యూనివర్సిటీల సంయుక్త భాగస్వామ్యంలో పరిశోధనలు, అధ్యాపకులు, విద్యార్థుల మార్పిడి, కొత్త కోర్సులకు సంబంధించిన అవగాహన ఒప్పంద ప్రతిపాదనపై ఇరు సంస్థల ప్రతినిధులు గురువారం చర్చలు జరిపారు.

కేంద్ర ప్రభుత్వ నిధులతో నడుస్తున్న ఇఫ్లూ నూతన విద్యా విధానంలో భాగంగా మార్పుల కోసం రాష్ర్ట విశ్వవిద్యాలయాలతో భాగస్వామ్యానికి కొంతకాలంగా ప్రయత్నాలు చేస్తోంది. ఈ మేరకు ఇఫ్లూ నుంచి ఉన్నతస్థాయి బృందం ఓయూ ఉపకులపతి ఆచార్య కుమార్ మొలుగరంను కలిసి విద్య, పరిశోధనలో భాగస్వామ్యానికి ఉన్న అవకాశాలు, మార్గాలపై చర్చించారు. 

ఆచార్య కుమార్ మాట్లాడుతూ.. ఇరుసంస్థల మధ్య భాగస్వామ్యం ఎంతో ప్రయోజనకరంగా ఉంటుందని ఇఫ్లూ ప్రతిపాదనలను స్వాగతిస్తున్నామని అన్నారు. ఇఫ్లూ ఉన్నతస్థాయి బృందంలో ప్రొఫెసర్ టీ శామ్సన్,  ప్రొఫెసర్ రేవతి శ్రీనివాస్, ప్రొఫెసర్ శారద, డాక్టర్ రాజారామ్, డాక్టర్ ఉపేంద్ర గుండాల పాల్గొన్నారు.

భాషశాస్త్రా లు, కమ్యూనికేషన్ స్టడీస్, డిజిటల్ హ్యూమనిటీస్, భాషా సాంకేతికతలు, అధ్యాపక అభివృద్ధి విషయాల్లో భాగస్వామ్యాలపై ఓయూ  ఇఫ్లూ మధ్య ఒప్పందాలు కుదిరే అవకాశాలున్నాయి.