హైదరాబాద్‌: రాచకొండ పోలీసులు ఎల్‌బీ నగర్‌ జోన్‌లోని స్పెషల్‌ ఆపరేషన్‌ టీమ్‌ (Special Operation Team), రంగారెడ్డి జిల్లా జిల్లా వైద్య, ఆరోగ్యశాఖ కార్యాలయం (డీఎంహెచ్‌ఓ) సహకారంతో జనవరి 21న అక్రమ కిడ్నీ మార్పిడి రాకెట్‌(Kidney transplant racket)ను గుట్టురట్టు చేశారు.  సరూర్ నగర్‌లోని డాక్టర్స్ కాలనీలోని అలకానంద హాస్పిటల్‌లో ఆపరేషన్ కేంద్రీకృతమై ఉంది. కీలకమైన వైద్యులు, మధ్యవర్తులు, వైద్య సహాయకులతో సహా ఈ రాకెట్‌లో పాల్గొన్న తొమ్మిది మంది వ్యక్తులను పోలీసులు అరెస్టు చేశారు. పట్టుబడిన వారిలో జనరల్ సర్జన్ డాక్టర్ సిద్దంశెట్టి అవినాష్, అలకానంద హాస్పిటల్(Alakananda Hospital) మేనేజింగ్ డైరెక్టర్ డాక్టర్ గుంటుపల్లి సుమంత్ ఉన్నారు. ప్రధాన శస్త్రవైద్యులు డాక్టర్ రాజ్ శేఖర్, డాక్టర్ సోహిబ్‌తో సహా పలువురు అనుమానితులు పరారీలో ఉన్నారు.

వైజాగ్‌లో ఉన్న నిర్వాహకులు ఈ రాకెట్‌ను నిర్వహించగా, కర్ణాటక, తమిళనాడు, నల్గొండ జిల్లాలకు చెందిన మధ్యవర్తులు, వైద్య సిబ్బంది కూడా సహకరించారు. అక్రమ అవయవ మార్పిడికి నిందితులు అలకానంద ఆసుపత్రిని కేంద్రంగా చేసుకున్నట్లు విచారణలో తేలింది. ఈ దాడిలో, పోలీసులు ఒక టాటా పంచ్ కారు, రూ.5,00,000 నగదు, 10 మొబైల్ ఫోన్‌లు, సర్జికల్ ఆపరేషన్ కిట్‌లను స్వాధీనం చేసుకున్నారు. పరారీలో ఉన్న మిగిలిన నిందితులను గుర్తించడానికి, రాకెట్   బాధితులను గుర్తించడానికి అధికారులు ఇప్పుడు తమ ప్రయత్నాలను ముమ్మరం చేశారు.