రష్మిక మందన్నా ఇటీవలి కాలంలో బాగా బిజీ అయ్యారు. టాలీవుడ్‌లోనే కాకుండా బాలీవుడ్‌లోనూ అవకాశాలు వెదుక్కుంటూ వస్తుండటంతో అమ్మడికి క్షణం తీరిక లేకుండా పోయింది. చాలా తక్కువ సమయంలోనే బాలీవుడ్‌లోనూ మంచి క్రేజ్‌ను రష్మిక సంపాదించారు. ‘యానిమల్’ సినిమా తర్వాత రష్మిక ప్రేక్షకుల ముందుకు వచ్చింది లేదు. ఆమె చేస్తున్న సినిమాలన్నీ వాయిదా పడుతూ రావడంతో చాలా ఆలస్యమైంది.

ప్రస్తుతం రష్మిక టైం నడుస్తోంది. ఆమె నటించిన సినిమాలు కొన్ని విడుదలకు సిద్ధమవుతుండగా.. మరికొన్ని చిత్రీకరణ దశలోనూ.. మరికొన్ని ప్రాజెక్టులు చిత్రీకరణకు సిద్ధమవుతున్నాయి. ఈ క్రమంలోనే రష్మిక సినిమాలు వరుసగా రిలీజ్ అయ్యే అవకాశం ఉంది. డిసెంబర్ 5న రష్మిక నటించిన పాన్ ఇండియా మూవీ ‘పుష్ప 2’ విడుదల కానుంది.

ఆ తరువాత బాలీవుడ్‌లో నటించిన ‘చావా’ అనే చిత్రం ద్వారా ప్రేక్షకులను పలకరించనుంది. ఆ తరువాత రాహుల్ రవీంద్రన్ దర్శకత్వంలో’గర్ల్ ఫ్రెండ్’, ఆ తరువాత సల్మాన్‌తో చిత్రం, నాగార్జున, ధనుష్ హీరోలుగా రూపొందుతున్న ‘కుబేర’, స్త్రీ 2 మేకర్స్ చేస్తున్న చిత్రం, ‘రెయిన్‌బో’ అనే చిత్రంలోనూ రష్మిక నటిస్తున్నారు. మొత్తానికి వచ్చే ఏడాదంతా రష్మిక హవానే నడవనున్నట్టు తెలుస్తోంది.