చిత్ర నిర్మాణ సంస్థ శ్రీ వెంకటేశ్వర సినీ చిత్ర (ఎస్‌వీసీసీ) మరో చిత్రాన్ని ప్రకటించింది. సుకుమార్ రైటింగ్స్ అసోసియేషన్‌తో కలిసి ఈ సినిమాను నిర్మించనుంది. ఈ రెండు సంస్థలు సంయుక్తంగా గత ఏడాది కార్తీక్ దండు దర్శకత్వంలో ‘విరూపాక్ష’ చిత్రాన్ని నిర్మించిన సంగతి తెలిసిందే. తాజా చిత్రాన్ని కూడా కార్తీక్ దండు దర్శకత్వంలోనే బీవీఎస్‌ఎన్ ప్రసాద్ నిర్మిస్తున్నారు. దీనికి దర్శకుడు సుకుమార్ కూడా నిర్మాణ భాగస్వామ్యం పంచుకుంటున్నారు.

అక్కినేని నాగచైతన్య హీరోగా నటిస్తున్నారు. శనివారం ఆయన పుట్టినరోజు సందర్భంగా ఫస్ట్‌లుక్ పోస్టర్‌ను విడుదల చేశారు. ‘ఎన్‌సీ24’ అనే వర్కింగ్ టైటిల్‌తో ఈ చిత్రం డిసెంబర్‌లో షూటింగ్ ప్రారంభించుకోనుంది. శ్యామ్‌దత్ సినిమాటోగ్రఫీ, నవీన్ నూలి ఎడిటింగ్ బాధ్యతలు స్వీకరించగా, ఆర్ట్ డైరెక్టర్‌గా శ్రీనాగేంద్ర, సంగీత దర్శకుడిగా అజనీష్ లోక్‌నాథ్ పనిచేయనున్నారు. ఈ సినిమాకు సంబంధించి నటీనటులు, ఇతర వివరాలను మేకర్స్ త్వరలో ప్రకటించనున్నారు. 

‘తండేల్’ యాక్షన్.. 

నాగచైతన్య జంటగా నటిస్తున్న చిత్రం ‘తండేల్’. యధార్థ సంఘటనల స్ఫూర్తితో డైరెక్టర్ చందు మొండేటి గీతా ఆర్ట్స్ బ్యానర్‌పై ఈ చిత్రాన్ని తెరకెక్కిస్తున్నారు. ఇందులో నాగచైతన్య మత్స్యకారుల నాయకుడు రాజు పాత్రలో కనిపించనున్నారు. శనివారం ఆయన పుట్టిన రోజు సందర్భంగా చిత్రంలోని ఓ యాక్షన్ పోస్టర్‌ను మూవీ మేకర్స్ రిలీజ్ చేశారు.

ఇందులో నాగచైతన్య పొడవాటి జుట్టు, మ్యాసీ గడ్డంతో రగ్గడ్ అవతార్‌లో, చేతిలో బరువైన యాంకర్‌ను పట్టుకుని, తుఫాను మధ్య ఓడపై నిలబడి కనిపించారు. ఫిబ్రవరి 7న విడుదల కానున్న ఈ చిత్రానికి సంగీతం: దేవిశ్రీప్రసాద్; డీవోపీ: షామ్‌దత్; సమర్పణ: అల్లు అరవింద్; నిర్మాత: బన్నీ వాస్. రచన చందు మొండేటి.