అమరావతి: సంకీర్ణ ప్రభుత్వం ఏర్పాటైన తర్వాత తొలిసారిగా ఆంధ్రప్రదేశ్‌లో పర్యటించనున్న ప్రధాని నరేంద్ర మోదీ(Prime Minister Narendra Modi) జనవరి 8న ఆంధ్రప్రదేశ్‌లో పర్యటించనున్నారు. ఈ పర్యటనకు సన్నాహకంగా ఆంధ్రప్రదేశ్ విద్యా, ఐటీ, ఎలక్ట్రానిక్స్, ఆర్టీజీఎస్ శాఖల మంత్రి నారా లోకేష్(Minister Nara Lokesh) ఆదివారం నాడు విశాఖపట్నంలో పర్యటించి ఏర్పాట్లను స్వయంగా పర్యవేక్షించారు. ఆయన వెంట మంత్రులు అచ్చెన్నాయుడు, డోలా బాల వీరాంజనేయస్వామి, కొండపల్లి శ్రీనివాస్, పార్టీ సీనియర్ నేత కళా వెంకట్రావు ఉన్నారు.

విశాఖపట్నం కలెక్టరేట్‌(Visakhapatnam Collectorate)లో నారా లోకేష్, మంత్రుల బృందంతో కలిసి ఉన్నతాధికారులు, కూటమి ప్రతినిధులతో సమీక్షా సమావేశం నిర్వహించారు. ప్రధాని పర్యటన సందర్భంగా ఎలాంటి అవాంఛనీయ సంఘటనలు జరగకుండా పటిష్టమైన భద్రతా ఏర్పాట్లు చేయాలని అధికారులను ఈ సమావేశంలో ఆదేశించారు. ఈ సమీక్షా సమావేశానికి ఆంధ్రప్రదేశ్‌లోని ఉత్తరాది జిల్లాలకు చెందిన ముఖ్య ప్రతినిధులు, అధికారులు హాజరయ్యారు.

ప్ర‌ధాన మంత్రి ప‌ర్య‌ట‌న‌ను విజ‌య‌వంతం చేసేందుకు స్టేక్ హోల్డ‌ర్స్ అంతా క‌లిసి ప‌నిచేయాల‌ని "మిష‌న్ మోడ్"‌లో నారా లోకేష్ కోరారు. ఎన్‌డిఎ ప్రభుత్వం(NDA Government) అధికారంలోకి వచ్చిన తర్వాత ప్రధాని రాష్ట్రానికి వస్తున్న తొలి పర్యటన కావడంతో ఈ పర్యటన చారిత్రాత్మకమని ఆయన అభివర్ణించారు. వివిధ అధికారులు, పార్టీ నేతలకు బాధ్యతలు అప్పగిస్తూ కార్యక్రమాన్ని చిరస్మరణీయంగా నిర్వహించేందుకు ఒకే ఎజెండాతో ఐక్యంగా కృషి చేయాలని నారా లోకేష్ పిలుపునిచ్చారు.