ఉత్తరఖండ్‌లోని బద్రీనాథ్ ఆలయ తలుపులు తెరవడంతో చార్ ధామ్ యాత్ర ప్రారంభమైంది. దీనికి ముందు కేదార్‌నాథ్, గంగోత్రి, యమునోత్రి యాత్రలు ప్రారంభమయ్యాయి. చార్ ధామ్ యాత్రను ప్లాన్ చేసుకునే వారు కచ్చితంగా అక్కడున్న అందమైన దృశ్యాలను కూడా చూసే అవకాశాలు ఉన్నాయి. మరి బద్రీనాథ్ తో పాటు సందర్శించేందుకు అనువైన పర్యాటక ప్రదేశాలను గురించి ఓ సారి తెలుసుకుందాం. 

నీలకంఠ శిఖరం: ఇది ఉత్తరాఖండ్‌లోని పురాతన శిఖరాలలో ఒకటి. ఇక్కడ అనేక అద్భుతమైన పర్యాటక ప్రదేశాలను చూడవచ్చు. నీలకంఠ శిఖరం ట్రెక్కింగ్‌కు కూడా ప్రసిద్ధి. బద్రీనాథ్ సందర్శించే వారు నీలకంఠ శిఖరాన్ని కూడా సందర్శించవచ్చు. 

వసుధార జలపాతం: బద్రీనాథ్‌లో వసుధార జలపాతం కూడా అందమైన పర్యాటక ప్రదేశం. ఈ జలపాతం ఎత్తు దాదాపు 12 వేల అడుగులు. ఈ ప్రదేశంలో పాండవులు విశ్రాంతి తీసుకున్నారని పురాణాలు చెబుతున్నారు. కానీ వసుధార జలపాతం చేరుకోవాలంటే 6 కిలోమీటర్లు ట్రెక్కింగ్ చేయాలి. బద్రీనాథ్ నుంచి ఈ గ్రామానికి టాక్సీ అందుబాటులో ఉంటుంది. 

చరణ్ పాదుకా: బద్రీనాథ్‌లో చరణ్ పాదుకా పర్వతం కూడా ఉంది. ఇది నగరానికి కేవలం మూడు కిలోమీటర్లు మాత్రమే. ఇక్కడ విష్ణుమూర్తి పాదముద్రలు చూడవచ్చు. ఇక్కడ శిలాఖండ్ అనే మతపరమైన ప్రదేశం కూడా ఉంది. దీనికి సంబంధించిన అనేక పురాణ కథనాలు ఉన్నాయి.

బద్రీనాథ్ ఎలా చేరుకోవాలి

బద్రీనాథ్ వెళ్లాలని అనుకుంటే రిషికేశ్, హరిద్వార్ లేదా డెహ్రాడూన్‌కి రైలులో వెళ్లవచ్చు. ఈ ప్రదేశాల నుంచి స్థానిక టాక్సీ లేదా బస్సులో బద్రీనాథ్ వెళ్ళవచ్చు. విమానంలో వెళ్ళాలనుకుంటే జాలీ గ్రాంట్ అంతర్జాతీయ విమానాశ్రయానికి వెళ్లి టాక్సీలో ఇక్కడకు చేరుకోవచ్చు.