వనపర్తి : వనపర్తి జిల్లా కేంద్రంలోని బాలుర ఉన్నత పాఠశాలలో ముఖ్యమంత్రి రేవంత్ రెడ్డి చదువుకున్న విషయం అందరికి తెలిసిందే. విద్యకు మారుపేరుగా వనపర్తి భవిష్యత్ లో ప్రతి ఒక్కరికి ఆదర్శంగా ఉండేందుకు సీఎం చదివిన పాఠశాల రూపు రేఖలు మార్చేందుకు ఎమ్మెల్యే మేఘారెడ్డి ప్రత్యేక చొరవను చూపుతున్నారు. అందులో భాగంగా వనపర్తి బాలుర పాఠశాలలో నూతన నిర్మాణాలు చేపట్టేందుకు రూ.160 కోట్లతో ప్రతిపాదనలను ఎమ్మెల్యే తయారు చేశారు.

ఈ నేపథ్యంలో సిఎం రేవంత్ రెడ్డిని ఎమ్మెల్యే మేఘారెడ్డి మంగళవారం మర్యాద పూర్వకంగా కలిసి వినతి పత్రాన్ని అందచేశారు. వనపర్తి నియోజకవర్గం అభివృద్ధిపై నిరంతరాయంగా కృషి చేస్తున్న ఎమ్మెల్యేను అభినందించారు. అధునాతన అంగులతో పాఠశాలను ఏర్పాటు చేసేందుకు రూపొందించిన రూ.160 కోట్ల ప్రతిపాదనకు సీఎం రేవంత్ రెడ్డి సానుకూలంగా స్పందించి వెంటనే మంజూరు చేయాలని అధికారులను ఆదేశించినట్లు ఎమ్మెల్యే మేఘారెడ్డి పేర్కొన్నారు.