హైదరాబాద్: తెలుగు రాష్ట్రాల్లోని పలు ప్రాంతాల్లో బుధవారం స్వల్పంగా భూమి కంపించడంతో కొద్దిసేపు ప్రజలు భయాందోళనలకు గురయ్యాయి. భూప్రకంపనలతో నివాసితులు తమ ఇళ్లు, అపార్ట్‌మెంట్ల నుంచి బయటకు పరుగులు తీశారు. రిక్టర్ స్కేలుపై భూకంపం తీవ్రత 5.3గా నమోదైంది. తెలంగాణలోని హైదరాబాద్ నగరంతోపాటు ఖమ్మం, రంగారెడ్డి, ఖమ్మం, భద్రాద్రి కొత్తగూడెం వరంగల్ ఉమ్మడి జిల్లాలతో సహా పలు ప్రాంతాల్లో భూకంపనలు నమోదయ్యాయి. హైదరాబాద్‌, రంగారెడ్డి, వనస్థలిపురం, హయత్‌నగర్‌, అబ్దుల్లాపూర్‌మెట్‌ తదితర ప్రాంతాల్లో భూమి కంపించింది. అదేవిధంగా ఉమ్మడి ఖమ్మం జిల్లాలోని కొత్తగూడెం, మణుగూరు, భద్రాచలం, చర్ల, చింతకాని, నాగులవంచలో ప్రకంపనలు వచ్చాయి. ఖమ్మం జిల్లాలో దాదాపు మూడు సెకన్ల పాటు భూమి కంపించినట్లు స్థానికులు తెలిపారు. ఆంధ్రప్రదేశ్‌లోని విజయవాడ, విశాఖపట్నం, కృష్ణ జిల్లా, జగ్గయ్యపేట తదితర నగరాల్లో ప్రకంపనలు వచ్చాయి. ఇంతవరకు పెద్దగా నష్టం జరగనప్పటికీ, ఈ సంఘటన ప్రభావిత ప్రాంతాల్లోని నివాసితులలో విస్తృతంగా ఆందోళన కలిగించింది. పరిస్థితిని అధికారులు నిశితంగా పరిశీలిస్తున్నారు.