యుకె పార్లమెంట్‌(UK Parliament)లో జరిగిన ఒక ప్రత్యేక కార్యక్రమంలో టాలీవుడ్ మెగాస్టార్ చిరంజీవి(Tollywood Megastar Chiranjeevi)ని సత్కరించారు. దీనికి అనేక మంది పార్లమెంటు సభ్యులు, మంత్రులు, డిప్యూటీ మంత్రులు, దౌత్యవేత్తలు హాజరయ్యారు. ఈ కార్యక్రమంలో, బ్రిడ్జ్ ఇండియా బృందం చిరంజీవికి జీవిత సాఫల్య పురస్కారాన్ని ప్రదానం చేసింది. వేడుక తర్వాత, చిరంజీవి సోషల్ మీడియా పోస్ట్ ద్వారా తన కృతజ్ఞతను పంచుకున్నారు. "చాలా మంది విశిష్ట వ్యక్తుల సమక్షంలో ఈ గౌరవాన్ని అందుకున్నందుకు నా హృదయం కృతజ్ఞతతో నిండిపోయింది. నా గురించి మాట్లాడిన మాటలు అపారమైన ఆనందాన్ని కలిగించాయి" అని చిరంజీవి తన అభిప్రాయాన్ని వ్యక్తం చేశారు.

ఆయన మాట్లాడుతూ, "బ్రిడ్జ్ ఇండియా బృందం అందించిన జీవిత సాఫల్య పురస్కారం నన్ను నిజంగా ఆనందపరిచింది. నా అభిమానులు, నా రక్త సోదరులు, సోదరీమణులుగా మారిన రక్తదాతలు, నా చిత్ర పరిశ్రమ కుటుంబం, శ్రేయోభిలాషులు, స్నేహితులు, కుటుంబ సభ్యులు, నా ప్రయాణానికి మద్దతు ఇచ్చిన ప్రతి ఒక్కరికీ నేను చేపట్టిన మానవతా కార్యక్రమాలలో పాల్గొన్న వారికి నేను హృదయపూర్వకంగా కృతజ్ఞతలు తెలుపుతున్నాను" అని చిరంజీవి అన్నారు. "ఈ గౌరవం నా పనిని మరింత ఉత్సాహంతో కొనసాగించడానికి నన్ను ప్రేరేపిస్తుంది. మీ అందమైన అభినందన సందేశాలకు మీ అందరికీ ధన్యవాదాలు." అంటూ చిరు పేర్కొన్నారు. అదనంగా, చిరంజీవి తన సోషల్ మీడియా ఖాతాల ఎక్స్ లో యుకె పార్లమెంట్ వేడుక నుండి ఫోటోస్ ను పంచుకున్నారు. ప్రస్తుతం ఆ ఫోటోస్ నెట్టింట్లో వైరల్ అవుతున్నాయి.